Tàm dơ̆ bơyai lơh, ala mat đơng lam Đảng, Dà lơgar, ồng Lê Minh Hưng, Thủ tướng Chính phủ neh jàu Gai lòng Lơh broă khà Dùl pà Đại học Kinh tế Quốc dân in tài neh geh cồng nha jak ngan tàm broă lơh kơlôi sơnơng jak chài, tàm jàu măi mok mờ bơto bơtê cau lơh broă geh bơta niam uă, pơgồp bơnah uă ngan tàm bơta bơtàu tơnguh lơh sa - mpồl bơtiàn dà lơgar dê. Ồng Lê Minh Hưng jờng rơ ală tă pơgồp dờng màng bơh Đại học Kinh tế Quốc dân dê ai broă lơh bơto bơsram mờ bơtàu tơnguh lơh sa - mpồl bơtiàn dà lơgar dê in. Tàm tŭ tơngai rài pa, Thủ tướng jàu hìu bơsram tơrgùm bơto bơtê cau jak, cau lơh broă geh bơta niam uă, tam gơl pràn gơ gơs bơto bơtê jat jơnau kờñ mùl màl dà lơgar dê, tơrgùm bồ tơngoh jak kòn bơnus lơh gơs (AI), bơta chài sồ mờ bơto bơtê nùs nhơm broă lơh, nùs nhơm lài ngan ki ngàm adat boh lam.

Di Ngai Cau pơgru Việt Nam mờr tus, Thủ tướng nting bơr ală pơgru, ală cau kơlôi sơnơng jak chài, kwang bàng, cau lơh broă sa priă nhai dà lơgar, cau lơh broă bal mờ jơh gùt cau bơsram dờng, cau bơsram Đại học Kinh tế Quốc dân bềng lìu pràn kơldang, gơboh gơbài mờ lơh geh cồng nha.