Càr Quảng Ngãi geh bơta pràn bơtàu tơnguh phan lơh sơnơm, kơphe, phan geh bơh brê mờ phan tàm dà. Mơya, lơh sa gam ờ tơrgùm bal, broă pơgồp bal đah làng bol mờ mpồl lơh sa kă bro gam ờ hềt nền nòn, bơta pràn lơh gơs phan gam ờ pràn. Den tàng, tơngai bơh nam 2026 tus 2030, càr ai geh gùng dà broă lơh, bơyai lơh wơl lơh sa, lơh gơs mpồl geh kwơ, tơnguh uă bơta niam phan geh lơh mờ rề ơnàng drà kă bro. Đơs tàm pơrjum bơyai, ồng Võ Văn Hưng, Thứ trưởng Bộ Broă lơh sa suơn sre mờ Tiah ơm kis sồr càr Quảng Ngãi tơrgùm bơtàu tơnguh lơh sa brê uă bơta kwơ pơgồp bal mờ chi lơh sơnơm, lơh sa suơn sre gơs phan kă bro geh bơta niam uă pơgồp bal mờ lơh gơs phan mờ lơh sa phan tàm dà pa.

Ồng Võ Văn Hưng đơs là, gơwèt mờ chi lơh sơnơm, càr Quảng Ngãi pal bơ̆t bơtàu mpồl geh kwơ bơh broă prăp gàr geh sơntìl, bơtàu tơnguh sơntìl tus mờ lơh gơs phan nền nòn mờ bơ̆t bơtàu măt kă bro: “Bañ mìng pờ ơnàng bă ù brê, tam ha là tăc phan geh lơh gam bè ờs. Jơnau kờñ là bơtàu tơnguh broă lơh uă chi lơh sơnơm, ai geh ală bơta phan geh khà jăk chài uă, geh măt kă bro mờ geh bơta kwơ lơh sa dờng”.

Dùl tàm ală bơta gơkờl geh mpồl lơh sa kă bro đơs tus tàm pơrjum bơyai là ờ tơl tiah tam tơrgùm bal. Ồng Phan Văn Hồng, Kwang Lam bồ Anih lơh sa suơn dờng, Công ty Cổ phần lơh gơs phan geh lơh bơh suơn sre Sao Mai pà git, nam 2026, mpồl lơh sa kă bro pơgồp bal mờ di pơgăp 120 anih, mpồl lơh broă bal mờ hìu làng bol tam rơlao 581 lồ ù tòm plai màk mờ prìt sơkò. Khà phan geh blơi di pơgăp 22 rơbô tấn, tàm tŭ jơnau kờñ bơh hìu măi dê là di pơgăp 75 rơbô tấn. Ồng Phan Văn Hồng dan mờ càr Quảng Ngãi dong kờl bơsong kal ke bè bă ù, bơtàu tơnguh tiah tam, phan bơna gùng lòt mờ ai màh sồ tiah tam: “Mìng geh ù, geh ù hơ̆ sồng geh tiah tam, hơ̆ sồng gơtùi lơh mờ lơh geh măi mok pa”.

Geh sền gròi bal tus mờ bơta do, ồng Nguyễn Trung Kiên, Phó Kwang Lam bồ dờng Tổng Công ty Cà phê Việt Nam sồr, càr dong kờl sền wơl sră nggal adăt boh lam bè ù tiah, ai tơngŏ tiah nhàr bă ù tam, bơsong tam phà mờ lơh geh jơnau yal tơngit drơng tàm broă jòi tiah tam: “Dan Anih duh broă Làng bol càr Quảng Ngãi sồr ală sờh, gah lơh broă mờ gơnoar atbồ kấp sàh pơgồp bal yal bè broă rơndăp lơh, bơta tŭ do ngui ù mờ phan bơna. Tàm tơngu me hơ̆, mpồl lơh sa kă bro gơtùi sền wơl, ai tơngŏ tiah tam gơdờp bal, pleh mờ broă tam phan sơgràm mờ rơndăp ù tiah geh ai, gàr niam gơnoar bal mờ bơta kwơ adăt boh lam bơh cau ngui ù dê”.

Tàm gah lơh sa dà lềng, ồng Trần Đình Luân, Cục trưởng Cục Phan tàm dà đơs là, phan geh lơh mờ broă lơh gơs phan tàm dà càr Quảng Ngãi dê ờ hềt di pal mờ bơta geh. Càr pal lơh wơl mpồl ơhò, lam sồr tam gơl broă lơh ờ geh cồng nha, tơnguh uă bơta niam broă prăp gàr tơnơ̆ tŭ lơh geh mờ hòi jà mpồl lơh sa kă bro bơcri priă lơh gơs phan nền nòn. Gơwèt mờ ròng phan tàm dà, pal ai tơngŏ loh làng tiah ròng tàm dà lềng, lơh geh bơta pràn 180 tơnao, mờ bơtàu tơnguh ală phan geh lơh krơi is pơgồp bal mờ broă sền gàr bơta kwơ mờ lòt nhơl niam. Ồng Trần Đình Luân geh jơnau đơs: “Kờñ hòi jà mpồl lơh sa kă bro tus bal tàm broă ròng phan tàm dà lềng den càr pal ai tơngŏ loh làng tiah do ròng gơtùi, tiah do bơtàu tơnguh gơtùi den hơ̆ sồng geh mpồl lơh sa kă bro tus bal. Bơh tŭ hơ̆ geh pơn jăt bal bè jơnau sơntìl, ròng, lơh gơs ing mờ lơh gơs phan”.

Ồng Hồ Văn Niên, Bí thư Tỉnh ủy càr Quảng Ngãi pà git, tơnơ̆ mờ tơmŭt bal càr Quảng Ngãi mờ càr Kon Tum, càr Quảng Ngãi pa geh bă ù bơtàu tơnguh pa, tơrgùm bơta pràn tiah jăt gah dà lềng đah tàm Gùl lơgar mờ brê bơnơm dờng Tây Nguyên dê. Do là tơngu me tờm tơrbŏ bal bơta pràn bè lơh sa mờ măi mok, anih ơhò dà lềng, phan tàm dà, lơh sa suơn sre krơi is, chi lơh sơnơm mờ lơh sa mờ brê kơl jăp. Ồng Hồ Văn Niên đơs tus jơnau: “Jơnau geh ai ờ di mìng là tơnguh ală bơta lơi neh geh lài, mờ pal bơyai lơh wơl lơh sa, bơsong bơta pràn, tơnguh uă bơta kwơ gơguh mờ gàr niam broă bơtàu tơnguh ndrờm bal đah lơh sa, mpồl bơtiàn mờ sền gàr phan kwơ geh is, tiah kis”.

Wèt tus nam 2045, càr Quảng Ngãi wèt tus bơtàu tơnguh broă lơh sa suơn sre pa, gơs tiah tờm lơh sa chi lơh sơnơm, lơh gơs phan bơh dơm chi mờ bơtàu tơnguh lơh sa dà lềng tàm tơnguh me lơh sa tơlir, lơh sa gơlòt bal.