Đơs tàm dơ̆ tìp măt, ồng Tô Lâm, Tổng Bí thư, Chủ tịch lơgar đơs nền, do là dơ̆ sền wơl ală cồng nha neh lơh geh mờ cri bơyai bè ală gùng dà broă lơh, jơnau kờñ tàm broă tơrbŏ bal bơta ngăc ngar, broă lơh mờng chài, bơta pràn đah lơgar Việt Nam mờ mpồl bơtiàn cau jăk chài cau lơgar Việt Nam tàm lơgar Nhật Bản.

Bơta git gơ̆p Tam klăc bal jŏ jòng tơl ală bơta đah lơgar Việt Nam mờ lơgar Nhật Bản gam tàm tơngai bơtàu tơnguh niam bơnĕ, mùl màl mờ geh cồng nha, tàm hơ̆ bơta jăk chài, măi mok, tam gơl pa bơceh lơh gam gơs dùl tàm ală bơta tờm lơh broă bal pa đah bàr lơgar dê. Ồng Tô Lâm, Tổng Bí thư, Chủ tịch lơgar đơs nền jơnau kơ̆p kờñ pơn jăt tai geh uă dơ̆ nàng iăt jơnau tam pà bal, mờ ală broă lơh mờng chài kơlôi sơnơng, ngui măi mok, pơgồp bal mùl màl tàm broă bơtàu tơnguh dà lơgar dê, kung bè ală broă pơgồp bal niam ai bơta git gơ̆p lơh bơyô bal niam bơnĕ đah lơgar Việt Nam mờ lơgar Nhật Bản.