Tàm uă ngai do, ồng Rơ Com Reng, kis tàm ƀòn dờng Pleiku, càr Gia Lai kis tàm bơta kơlôi rơcang, pơlai tơnơ̆ mờ tŭ 126 tơlăk đong priă tăc kơphe hìu nhă dê gơtìp pơrlồm roh jơh mìng tàm 2, 3 phút. Ồng Yal wơl, tàm 1 ƀùi mho lồi nhai 3 nam 2025, ồng dờp geh dơ̆ hòi điện thoại bơh dùl nă cau sơnđan là cau lơh broă gah ồs đèng, sồr ồng tơm priă ồs đèng mờ sồr ồng jào priă jăt broă tơm priă tàm internet nàng “ƀuơn mờ gàr bơta ndơ̆p rơlao”. Pin dờn mờ jơnau sồr lơh bè niam bơnĕ, nền nòn tàm broă bơto sồr, ồng lơh jăt ală jơnau sồr mờ neh di dong kờl cau pơrlồm sơgràm geh anih priă jền ồng dê mờ pờ tă jơh khà priă: “Bol khi đơs là ai măi điện thoại bơh kòn ùr ồng Reng, bơto sồr tơmŭt app đah ồs đèng. Gam măi añ den hòi mờ video, bơto sồr nền nòn tơm priă ồs đèng bè do bè ne. Tơnơ̆ mờ hơ̆ là ai muh măt nàng đal, kŭp rùp QR. Kòn ùr añ sền anih priă jền, roh jơh 126 tơlăk đong, ờ gam dùl đong tai lơi”.

Bơh bồ nam 2025 tus tŭ do, gùt càr Gia Lai neh dờp geh 14 dơ̆ gơtìp pơrlồm bơh tàm internet mờ kờp jơh priă hoàc huơr 12 tơmàn 900 tơlăk đong. Mìng is broă lơh bè cau lơh broă gah ồs đèng neh geh 6 nă cau yal, hoàc huơr mờr 400 tơlăk đong. Jăt jơnau kờp bơh Cơl dŭ lơh broă sền gàr internet mờ rơcang kơrian cau tìs ngui măi mok pa, gơwèt Kwang àng càr Gai Lai dê, geh 3 bơnah 4 cau gơtìp là cau ùr mờ 1 bơnah 3 dơ̆ gơtìp tàm ƀòn dờng Pleiku. Jơh ală dơ̆ ndrờm geh bơh tàm internet mpồl bơtiàn, mìng bơh ală anih lơh ờ ngan tàm Facebook bơh broă pơrlồm yal, pơn jồh bơcri priă ha là lơh bè cau pròc mhàm, anih lơh broă geh gơnoar. Dùl bơta lơh broă lùp khào gơtìp kal ke là geh uă ngan ală anih priă jền dờp priă pơrlồm là anih priă jền mpồl lơh sa kă bro. Ală anih priă jền do mờng geh ơpah ha là blơi wơl mờ sră pơ-àr ờ ngan, lơh gơtìp kal ke tàm broă kơrian priă jền, tàm hơ̆ uă ngan tŭ mpồl priă gơtìp jun pơdar lik lơgar bơdìh mìng tàm 2, 3 phút.

Tŭ do mpồl lơh broă kwang àng càr neh pơgồp bal mờ ală anih priă jền dờng bè Vietcombank, BIDV, MBBank…nàng đal sền anih priă jền geh pin pơrdah, kơrian ing priă mờ dong kờl tơrmù wơl hoàc huơr. Kơnờm mờ hơ̆, tàm nam 2024 mờ bồ nam 2025, neh kơrian geh mờ jào wơl rơlao 10 tơmàn đong bơh ală dơ̆ pơrlồm ndrờm bal. Mơya, kung gam uă ngan kal ke tàm broă pơgồp bal, tàm hơ̆ uă ngan là mờ ală anih priă jền kă bro bơdìh càr. Thiếu tá Phạm Học, kwang bàng lơh broă lùp khào Cơl dŭ lơh broă sền gàr internet mờ rơcang kơrian cau tìs ngui măi mok pa, Kwang bàng càr Gai Lai pà git: “Ală tŭ gơtìp làng bol geh nùs nhơm ngòt rơngơ̆t, jào priă uă, jào khà priă dờng, bol añ sồr ală anih priă jền di tŭ ơm ing, yal lài nàng làng bol in git. Mờ lùp kwang bàng bơh anih lơh broă nàng bơsong mờ di tŭ kơrian. Mơya, geh ờ uă anih priă jền kă bro bơdìh càr, broă pơgồp bal ai jơnau tơngit gam lơyài, lơh kal ke tàm broă lùp khào, jòi wơl khà priă, jòi wơl cau pơrlồm”.

Cơl dŭ lơh broă sền gàr internet mờ rơcang kơrian cau tìs ngui măi mok pa, Kwang àng càr Gia Lai bơto sồr làng bol pal kah jơnau yal jăt “4 ờ 4 pal” bè “nha kơrian” nàng sền gàr să tờm tềng đăp mờ cau tìs măi mok pa. 4 ờ tàm hơ̆ geh: ờ lơh jăt jơnau sồr bơh cau krơi tàm điện thoại ha là tàm internet mpồl bơtiàn; Ờ lơh kwèng mờ cau krơi tàm internet, tàm hơ̆ uă ngan tàm Facebook; Bañ kờñ kwơ ir bơh jơnau hòi jà broă lơngai priă nhai uă, bơcri priă geh uă priă cồng; Ờ ai jơnau tơngit să tờm, anih priă jền, màh OTP, ha là hòi điện thoại mờ video tŭ ờ hềt git loh măt cau. 4 pal, tàm hơ̆ geh: Pal git jơnau tơngit lài mờ tŭ jào priă, geh bal mờ cau pròc mhàm; pal rơcang ngăc tŭ tus bal mpồl bơtiàn, boh bơr mờ cau ờ git nền muh măt; Pal yal kwang àng in git ha là cau pròc mhàm in git di lah geh pin pơrdah gơtìp pơrlồm; Pal sền nàng git nền nòn lài mờ tŭ bơcri priă ha là lơh sră priă jền tàm internet. Thượng tá Đinh Văn Sơn, Phó kwang lam bồ Cơl dŭ lơh broă sền gàr internet mờ rơcang kơrian cau tìs ngui măi mok pa, Kwang àng càr Gia Lai pà git: “Bol añ pơn jăt tai dan mờ gơnoar atbồ kwang àng càr geh ală gùng dà broă lơh, broă rơndăp lơh, sồr lơh ală mpồl lơh broă tàm càr, tàm hơ̆ is ồn là kwang àng tàm ală sàh pơn jăt tai lơh niam broă git ală bơta gơlik geh nàng di tŭ gŏ. Bơdìh hơ̆ tai, bol añ sùm git ală gùng dà broă lơh, jơnau pơrlồm bơh cau ờ niam nàng mblàng yal tus làng bol in, di tŭ nàng git, rơcang lài, pơgồp bal mờ ală mpồl lơh broă tàm dơlam mờ bơdìh gah kwang àng nàng tam dră mờ cau tìs ngui măi mok pa; mờ dan geh ală phan lơh broă pa nàng tam dră geh cồng nha mờ ală bơta tìs do”.

Tàm bơta phan măi mok pa bơtàu tơnguh sùm jăt ngai, bơdìh mờ broă yal lài, lùp sền bơh anih lơh broă geh gơnoar, den broă ngăc ngar mờ rơcang lài bơh tơl nă làng bol là bơta tờm nàng sền gàr is să tờm mờ hìu nhă tềng đăp mờ ală dơ̆ pơrlồm bơh cau tìs tàm internet dê.