Di tơngkah kir sơnrai 135 nam Ngai deh Củ tịc Hồ Chí Minh kờñ gơboh, mho ngai 19/05, tàm ƀòn dờng Kon Tum, Mpồl Tam klăc Cau ùr càr Kon Tum bơyai lơh Pơrjum jờng rơ pơnrơ gơguh jak tơngai bơh nam 2020- 2025 mờ ràng tơlik rùp hin bal mờ tơngume “Wa Hồ mờ Cau ùr Việt Nam”. 05 nam do srơh tàm pơrlòng gơboh lơgar tàm rlau 100 anih lơh broă mpồl cau ùr càr Kon Tum, neh lơh gơlik geh tam gơl uă ngan, ngan ngồn, lơh gơrề pràn kơldang tàm mpồl bơtiàn. Ală kâp mpồl neh hòi tơrgùm bơ̆t bơtàu geh 35 nơm “Hìu ram bơta nđàc”, jàu pà gĭt nđờ jơ̆t brô bơnah priă dong kờl bơsram, bơnah phan pà; dong kờl lơh jăt ngan ngồn rlau 30 jơnau kơlôi lơh, rơndăp broă lơh sơnđờm mŭt lơh broă bơh cau tàm mpồl, cau ùr dê; bơ̆t bơtàu mờr 940 broă lơh tơrlòng lài, broă lơh jak tàm ală broă.

Tàm 05 nam, neh geh rlau 1 rbô 700 hìu cau ùr tàm mpồl lik klàs rƀah, rlau 1 rbô 360 hìu geh 8 broă jàu hìu bơnhă 5 ờ, 2 kloh; 860 mpồl, cau nă să is là kwang bàng, cau ùr tàm mpồl càr Kon Tum geh ală kâp, gah, ƀòn lơgar jờng rơ, pà khà jờng.