Củ tịc lơgar lài do ồng Trần Đức Lương deh ngai 05 nhai 05 nam 1937 tàm sàh Phổ Khánh, kơnhoàl Đức Phổ, càr Quảng Ngãi. Ồng tus bal lơh broă kăc màng nhai 02 nam 1955. Bơh nhai 02 nam 1955 tus nhai 09 nam 1955 ồng geh tơrgùm tus đah Tô dà lơgar, bơsram sơ kấp gah địa cất. tơnơ̆ mờ hơ̆ ồng lơh broă tàm Đoàn Địa cất 20 mờ ală gơnoar broă bơh cau lơh broă, cau atbồ mpồl lơh broă tus mờ phó kwang lam bồ mpồl. tơnơ̆ mờ tơngai bơsram tai tàm Hìu bơsram Đại họk Mỏ - Địa cất, 20 nam sơnrờp lơh broă, ồng neh lòt gùt tiah brê bơnơm nàng sền mờ kơlôi sơnơng ù tiah, pơgồp bal kwơ màng tàm broă bơ̆t bơtàu bơta phan geh is dà lơgar drơng broă bơtàu tơnguh lơh sa mpồl bơtiàn.

Ồng neh geh jào uă kơnòl broă: Lam bồ phó Kụk sră wăc rùp ù tiah phan dơlam ù, Lam bồ dờng Kụk Phan dơlam ù; Phó Cau lam bồ mờ kong kơnòl, hơ̆ sồng guh lơh Cau lam bồ mờ kong kơnòl Anih duh broă Jăk chài mờ Măy mŏk Quốk hội dê. Ală cau lơh broă bal mờ ồng Trần Đức Lương tàm gah phan dơlam ù tiah kung gam kah sùm ală jơnau lời kir bè ồng dê, cau lơh broă bal, cau đơng lam lam lài, jơh nùs. Ngoh rơngăc bè broă sang rài bơh Củ tịc lơgar lài do ồng Trần Đức Lương, TS ồng Nguyễn Thành Vạn, lài do Lam bồ phó Kụk Sră wăc rùp ù tiah phan dơlam ù mờ Phan kwơ tàm ù Việt Nam gơwèt Ƀộ Broă lơh sa sươn sre mờ Tiah ơm kis yal: “Gơwèt mờ añ, Củ tịc lơgar ồng Trần Đức Lương mờ lài do bol añ kung gam hòi đềt mềr là bi Trần Đức Lương. Bi hơ̆ dùl nă cau bi mờ là dùl nă cau pơgru. Bi hơ̆ bơsram is nền nòn ngan mờ geh dùl tơngai tìp bal mờ ală bơta tàm ù tiah bal mờ dùl bơta jăk chài ngan. Bi hơ̆ lơh broă tơn mờ cau chài bơh lơgar Liên Xô, bi hơ̆ bơsram is mờ bi hơ̆ đơs dà Nga jăk ngan, bi hơ̆ yal jơh ală broă mờ dà lơgar Nga tơn mờ mpồl cau jăk đah ù tiah, ală cau jăk tus bơh lơgar Liên Xô kung gơlơh ngềr ngan sơl. Ală bơta ù tiah mờ tơnơ̆ do bol añ đơng lam lơh, bi hơ̆ ndrờm geh ală jơnau đơs mờ jơnau pơgồp bal niam, ai geh gùng dà broă lơh kwơ màng ngan. Bi hơ̆ kung tề lam mờ bơto añ uă ngan mờ añ bơsram geh uă ngan bơta niam bơh bi Trần Đức Lương dê”.

Bơh nam 1987 tus nhai 8 nam 1992, ồng Trần Đức Lương geh tam pà lơh Phó Củ tịc Mpồl duh broă Ƀộ trưởng (tŭ do là Phó Thủ tướng Cíñ phủ), mờ là cau ala măt duh broă sùm lơgar Việt Nam tàm Mpồl duh broă dong kờl Lơh sa. Mờ bơh nhai 9 nam 1992, ồng at gơnoar btroă Phó Thủ tướng tus nam 1997. 10 nam tàm gơnoar broă Phó Thủ tướng, kung là tŭ dà lơgar lơh jăt pràn ngan gùng dà tam gơl pa Đảng dê, tam gơl să bơh lơh sa rơndăp broă tơrgùm bal tus mờ lơh sa kă bro jăt gùng dà sàh hội củ nghĩa mờ uă bơta kal ke. Tàm bơta hơ̆, să tờm Phó Thủ tướng ồng Trần Đức Lương neh bal mờ mpồl kwang bàng tàm Cíñ phủ dờp kơnòl broă uă ngan tàm tơngai sơnrờp tam gơl pa nàng ai dà lơgar rơhời lik klàs kal ke, pơgồp bal tàm broă lơh geh cồng nha bơh broă tam gơl pa dê.

Ki ngàm rài kis bal mờ broă lơh bơh Củ tịc lơgar lài do ồng Trần Đức Lương dê ai dà lơgar in, tàm hơ̆, geh tơngai lơh Phó Thủ tướng, Phŏ Pơgru dờng. Tiến sìh mò Bùi Thị An, cau ala măt Quốk hội khoă 13, Lam bồ Anih kơlôi sơnơng Phan geh is, Tiah ơm kis mờ Bơtàu tơnguh mpồl bơtiàn, Phó Củ tịc Mpồl tam klăc ală Mpồl Jăk chài mờ Măy mŏk ƀòn dờng Hà Nội đơs: “Tơngai ồng Trần Đức Lương at gơnoar broă Phó Thủ tướng, dà lơgar gam kal ke ngan. Mơya ồng neh lơh ngan, lơh ngan bal mờ Cíñ phủ, ồng neh lơh ngan bơh să tờm, mờ bơta pràn is bơh dà lơgar dê mờ tơnơ̆ mờ hơ̆ ală kwang bàng sền geh rơwah ală broă lơh mờng chài bơh lơgar bơdìh nàng ai dà lơgar sơrlèt mờ tơngai hơ̆ rơhời brồ guh bè đah lơh sa, bè đah cíñ trị kơl jăp, bơngă dà lơgar geh gơguh. Tàm hơ̆ kung geh broă pơgồp bal bơh ồng Trần Đức Lương dê mờ gơnoar broă là Phó Thủ tướng, drơng broă lơh sa mờ măi mok kal ke ngan, mờ neh sơrlèt jai”.

Tàm bàr tơngai at gơnoar broă Củ tịc lơgar bơh nam 1997 tus 2006, ồng Trần Đức Lương neh geh ală broă pơgồp bal dờng màng tàm broă lơh tàm lơgar mờ lơgar bơdìh, pơgồp bal gàr kơl jăp cíñ trị, lơh pràn bơtàu tơnguh lơh sa mờ tơnguh bơngă mờ ală lơgar bơh lơgar Việt Nam dê. Ồng Trần Đức Lương sền gròi ngan tus mờ broă bơ̆t bơtàu Dà lơgar adăt boh lam sàh hội củ nghĩa, lơh pràn broă lơh sră nggal, tơnguh gơnoar bơh adăt boh lam dê tàm rài kis mpồl bơtiàn. Tàm tơngai do, ală broă lơh niam wơl bè gùng dà broă lơh, rơndăp broă dà lơgar bal mờ sră nggal rơhời geh lơh, ai geh bơta tờm tàm bơ̆t bơtàu mờ tơrgùm bal dà lơgar. Cau lơh ƀăo Hà Đăng, Kwang lam blồ mpồl bồ tơngoh, Niam chài Dà lơgar lài do yal bè ală bơta niam bơh Củ tịc lơgar ồng Trần Đức Lương dê: “Ồng Trần Đức Lương lơh Củ tịc lơgar kung neh lời geh uă bơta niam. Mơya hơ̆ là tŭ broă lơh sa bơh lơgar he gam gơguh, moưya kung gam tìp uă ngan kal ke den ồng Trần Đức Lương kung là dùl nă Kwang bàng Củ tịc lơgar geh nùs nhơm niam ngan mờ làng bol, oh mi mờ gơwèt mờ mpồl kwang bàng kung bè hơ̆ sơl. Ală bơta mờ ồng lơh gơtùi neh ai tơngŏ bơta niam tŭ ồng bơsong broă Củ tịc lơgar”.

Ờ mìng là dùl nă kwang đơng lam geh bơta jăk chài, Củ tịc lơgar lài do ồng Trần Đức Lương gam là dùl nă đảng viên dờn song, jơh rài lơh ngan tài bơta niam kộng sản. bơh nam 1959, ồng neh mŭt Đảng, neh rơlao 65 nam lơh broă sùm ờ ơm rơlô. Tàm ală gơnoar broă lơh, ồng sùm ai tơngŏ nùs nhơm lam lài, đềt mềr mờ làng bol. Mờ ală broă pơgồp bal dờng màng ai dà lơgar in, ồng Trần Đức Lương neh geh Đảng mờ Dà lơgar jào pà uă phan jờng rơ kwơ màng bè Huân cương Sơrmañ rơmit, Sơlong 65 nam sơnam Đảng mờ gai lòng phan pà kwơ màng ndai bơh lơgar Việt Nam mờ ală lơgar dê.

Củ tịc lơgar ồng Trần Đức Lương sang rài. Đảng, Dà lơgar mờ Làng bol Việt Nam roh tĕ dùl nă kwang đơng lam jăk chài, jơh nùs jơh tồr mờ sùm ai bơta kwơ dà lơgar bal mờ làng bol hờ đăng rơlao jơh. Rài kis mờ broă lơh ồng dê là krơh àng ai ală rơnàng kwang bàng, đảng viên in đòm jăt.