Do là broă lơh kuơmàng ngan rlau jơh tàm pơrjum dờng Sau gơlòng sồr Wa Hồ gùt lơgar dơ̆ 10 nàng kờñ jờng rơ cồng nha bơh ală sau gơlòng sồr Wa Hồ dê jak ngan tơngai bơh nam 2020 tus nam 2025 tàm broă lam lơh srơh “Kơnòm dềt Việt Nam tàm pơrlòng lơh jat 5 bơta Wa Hồ bơto”.

Đơs tàm pơrjum dờng, Củ tịc lơgar ồng Lương Cường jờng rơ ală cồng nha jak ngan bơh 500 krơh niam pơn rơ sau gơlòng sồr Wa Hồ jak ngan, bal mờ jơh gùt đội viên, kơnòm pa tàu, kơnòm dềt gùt lơgar neh lơh geh tàm tơngai lài. Củ tịc lơgàrr pà git, tŭ gam kis, Wa Hồ sùm lời ai nùs nhơm kờñ gơboh dờng ngan kơnòm dềt Việt Nam in. Củ tịc lơgar pin dờn là, ală sau dềt gùt lơgar rơp pơn jat tai lơh ngan rlau tai, pơn đơl pràn uă rlau tai; tam klac bal mờ gơp sền gàr mờ sơlơ lơh niam tai bơta kuơ bơh yau niam bơnĕ jơi bơtiàn Việt Nam khin cha jak chài dê.