Jơh ală broă ndrờm cih dờp khà gơguh uă đau pơndrờm bal dùl tŭ mờ nam lài. Sơñio khà lơh gơlik phan bơh lơh sa mờ măy mŏk kờp dŭ gơguh rlau 20%; kờp jơh khà tăc rah rài phan bơna mờ priă geh bơh kă bro phan drơng broă lơh geh rlau 10 rbô tơmàn đong; Rề dia geh rlau 4 rbô 900 tơmàn đong. Broă lơh tăc mờ lơgar ndai, bơcri priă, niam chài- lòt nhơl mờ sền gàr niam rài kis mpồl bơtiàn kung lơh geh uă cồng nha sơl. Broă lơh dong kờl lơh pa, lơh niam wơl hìu ing, hìu ồm sèt ñhăt dà mìu geh lam lơh mhar, geh rlau 54% broă rơndăp lơh. Bơdìh mờ ală cồng nha lơh geh, pơrjum kung song dơ pă ai gĭt bàr pe gam gơkòl, ờ hềt pràn jak, bè: gơguh lơh sa ờ hềt mùl màl pràn; uă rơndăp broă lơh bơcri priă dà lơgar lơyài lam lơh; khà mpồl lơh sa kă bro ơm lơh broă kung gam uă sơl.

Tàm pơrjum, ồng Nguyễn Đình Trung, Ƀí thư Tỉñ ủy càr Dăk Lăk sồr đơng lam ală ƀòn lơgar, mpồl gah tàm càr rơcăng lài, kràñ cê jơh nùs lơh jăt ală kơnòl broă neh sồr lơh; tơn jơh jơnau kơn jơ̆ kơn jŭt tàm mpồl lơh broă tơnơ̆ tơmŭt bal tàm bàr pe mpồl lơh broă, ờ gŏ di lời gơrềng tus tơngai hơ pơrgon lơh gơs broă lơh bal càr dê.