Bi Lê Thị Phương Thu, ơm tàm thôn Đức Hoà, là kông cứk lơh broă tàm Anih duh broă Làng bol sàh Đức Mạnh, kơnhoàl Dăk Mil, càr Dăk Nông. Bi Thu pà gĭt, hìu bơnhă geh 2 nă sau dềt, sau dờng bơsram ơdŭ 6, sau dềt bơsram ơdŭ 1. Bơklau lơh broă ling klàng ờ ru ngan tàm broă lơh, dùl nă bi sền gàr ròng siam oh kòn den tàng pah dơ̆ kàl rlô bơkang tus den bi kơlôi rcang ngan bè lơngăp lơngai bơh kòn dê tŭ lòt nhơl bal mờ gơ̆p bơyô.

Tàm hơ̆, bơta kơlôi rcang lài ngan là bơta ngòt rơngơ̆t tŭ um dà dờng, tơnau dà:“Trăng gàr kòn tàm dơ̆ kàl rơlô bơkang gơwèt mờ ùr bơklau añ dê den kung kal ke ngan sơl, tài bơh dilah lời ală sau ơm nhơl is tàm hìu den ờ ing nùs. Den tàng añ pal jun rê mờ ồng mò đah bơklau dê, dong kờl. Ai dilah nhơl is, añ geh nting tơngkah ală sau pleh ờ gŏ di lòt nhơl tàm ală tiah geh tơnau dà, dà dờng, dà croh, sơbơng roh ngan tàm ală ngai rlô bơkang”.

Dăk Nông geh bă ù ơnàng rlau 6 rơbô 500 kơi sồ vuông, mờ ală tơnau dà, dà dờng, dà croh uă ngan digơlan gơlik geh uă bơta rềs àr bŭ dà. Bi Điểu Lê Nam Nam, Lam bồ Mpồl Ơruh pơnu, kơnòm pa tàu mờ kơnòm dềt hìu bơsram Tiñ đoàn càr Dăk Nông, pà gĭt, nàng tơrmù ƀà bơta rềs àr, tàm tơngai pa do ală kấp, gah broă neh lơh 20 nơm tơnau re dà tàm 7 kơnhoàl, ƀòn dờng mờ pờ gĭt nđờ rơhiang ơdŭ bơto rê dà ờ sa priă ai kơnòm dềt in. Mơkung pơgồp bal mờ ală sờh, mpồl, gah broă ƀòn lơgar lam lơh uă broă lơh dong kờl kơnòm dềt rcang lài kơryan bŭ dà, rềs àr sồt să, is ồn là bŭ dà. Bi Điểu Lê Nam Nam, đơs: “Tỉñ đoàn càr kung neh sồr ală đoàn ƀòn lơgar gơwèt càr sơlơ tơnguh tai ngui loa ntrờn làm bă tiah nàng lam lơh mblàng yal tus mờ ală rơnàng làng bol tàm ală thôn, ƀòn ală tiah sùm gơlik geh rềs àr bŭ dà. Bơdìh hơ̆, lam lơh crăp kƀàng yal tơngĭt, pà phan pơrđồng lơh is ai ală hìu bơnhă geh tiah tơnau dà, tơnau dà tờ is nàng rcang lài kơryan bŭ dà. Pơgồp bal mờ kwang àng, gơnoar atbồ sàh tus tơl hìu bơnhă làng bol geh tơnau dà tờ is kĭ sră hơ pơrgon pal geh broă lơh gàr niam rcang lài kơryan bŭ dà”.

Tơr gùm kờp bơh Sờh Lơh sơnơm càr Dăk Nông pà gŏ, bơh bồ nam tus tŭ do tàm càr gơlik geh 14 dơ̆ rềs àr sồt să, lơh 20 nă kơnòm dềt chơ̆t. Tàm hơ̆ 12 dơ̆ bŭ dà lơh 18 nă kơnòm dềt chơ̆t, gơguh uă pơndrờm dùl tŭ bal mờ nam 2024. Ală dơ̆ bŭ dà gơlik geh uă ngan tàm ală kơnhoàl Dăk Mil, Dăk R’lấp, Tuy Đức, Dăk G’long mờ ƀòn dờng Gia Nghĩa. Ồng Hoàng Viết Nam, Phó Kwang Lam bồ Sờh Lơh sơnơm càr Dăk Nông, yal:“Bơta bŭ dà tàm ù tiah càr Dăk Nông tàm tơngai pa do gơlơh bè ndrờm gơlik geh tàm ală tơnau dà tờ is bơh ală hìu bơnhă dê là tờm. Den tàng gơwèt mờ gah Lơh sơnơm, bol añ hòi jà ală hìu bơnhă sùm sền gròi tus ală oh kòn he dê, lơh bè lơi nàng lơh geh tiah nhơl lơngăp lơngai ngan rlau jơh tàm kàl rơlô bơkang nam 2025 do”.

Ồng Trần Sĩ Thành, Phó Kwang Lam bồ Sờh Bơto bơtê mờ Bơsram càr Dăk Nông pà gĭt, pah dơ̆ tus tàm kàl rlô bơkang pah nam, Sờh ndrờm pơgồp bal mờ Kwang àng càr, Sờh Lơh sơnơm mờ ală mè bèp kơnòm bơsram dê lam lơh ală broă lơh rcang lài kơryan rềs àr sồt să, tàm hơ̆ geh bŭ dà ai kơnòm bơsram in.

Sờh kung sồr ală hìu bơsram pờ ală ơdŭ bơsram bơdìh bè bơta chài kis nàng kờñ rcang lài kơryan rềs àr sồt să bè ồs đèng jờk, ồs sa bơrtoh, rềs àr gùng lòt mờ is ồn là bŭ dà: “Sờh pơgồp bal mờ Tỉñ đoàn càr, ală mpồl, gah broă tŭ tàm jàu kơnòm bơsram ai hìu bơnhă in den pal bơto bơtê, rcang lài bơta gĭt wă ai ală kơnòm in bè rcang lài kơryan rềs àr tàm kàl rơlô bơkang. Mơkung sồr ală hìu bơsram pơgồp bal mờ mè bèp kơnòm bơsram atbồ oh kòn niam ngan rlau tai, ai kơnơnòm bơsram in geh tus bal uă mờ ală ơdŭ bơsram bè rcang lài kơryan rềs àr sồt să mờ is ồn là bơta chài bơto re dà ai ală sau in”.

Rcang lài kơryan bŭ dà ai kơnòm dềt in ờ mìng là kơnòl broă bơh tơl hìu bơnhă dê lơm mờ gam là kơnòl broă jal mhar bơh ală kấp, ală gah broă, gơnoar atbồ ală tiah mờ jơh gùt mpồl bơtiàn dê. Ală khà kờp jê nùs jê tồr ngan bè rềs àr bŭ dà tàm tơngai pa do tàm càr Dăk Nông là jơnau lơh kah rơngal wơl, sồr pal geh bơta mut lơh bal kràñ cê jơh nùs, dồ ròt bal rlau tai. Ală anih lơh broă geh gơnoar pal pơn jat tai lơh jat nùs nhơm geh kơnòl, lơh pràn broă lơh mblàng yal, bơto bơtê bơta chài kis, pờ uă ală ơdŭ bơto re dà, sơlơ tơnguh tai lòt sền, jat sền ală tiah geh pơhìn gơbàn sơbơng roh uă... nàng kờñ lơh geh tiah ơm lơngăp lơngai ai kơnòm dềt in, is ồn tàm tơngai kàl rơlô bơkang.