Hơ jơnau lùp là Ƀộ trưởng Ƀộ Priă jền mờ Ƀộ trưởng Ƀộ Jak chài mờ Măi mok; ală Phó Thủ tướng Chính phủ, Ƀộ trưởng, Lam bồ gah broă lơh geh gơ rềng tus bal hơ jơnau lùp, mblàng lơh loh. Ồng Lê Minh Hưng, Thủ tướng Chính phủ hơ tơn jơnau lùp bè ală broă gơ wèt kơnòl Chính phủ dê. Ală tơngume gơ wèt 2 mpồl broă lùp neh geh bàr pe nă cau ala mat Quốc hội sền gròi, đơs tàm dar cribơyai bè lơh sa - mpồl bơtiàn ngai 30 mờ ngai 31/10 pa do, neh geh 19 nă cau ala mat cribơyai bè ală broă gơ wèt gah priă jền, 11 nă cau ala mat cribơyai bè ală broă gơ wèt gah jak chài mờ măi mok.

Ồng Trần Thanh Mẫn, Chủ tịch Quốc hội đơs là, lùp mờ hơ jơnau lùp là broă lơh jat sền tơn, ai tơnggŏ loh kơnòl Quốc hội, Chính phủ mờ ală anih lơh broă geh gơ rềng dê tềng đap cau tĕ khà, Làng bol gơ wèt mờ broă lơh jat ală jơnau hơ pơrgon, kơnòl broă geh jàu mờ ală tam gơl pa tơnơ̆ ală dơ̆ lùp mờ hơ jơnau lùp lài hơ̆. Dar lùp mờ hơ jơnau lùp dơ̆ do pơn jat tai ai tơnggŏ nùs nhơm Quốc hội lòt bal mờ Chính phủ, tơrgùm tàm ală bơta gơ kòl, đơs loh ală kal ke, bơta gơ kòl nàng di tŭ tă bơsong, hòi jà mờ ngui geh cồng nha ală bơnah priă jền, tơnguh cồng nha, bơta niam gơguh tai, gàr kơ̆ lơh sa dờng, bơtàu tơnguh mhar, kơ̆ kơljap jŏ jòng sùm mờ tơnguh niam rài kis làng bol dê.