Càr Dăk Lăk sơn đờm lơh Hìu bơsram ơm sa bic tơn kâp 1 mờ kâp 2 sàh Ea Bung. Broă lơh geh kờp jơh priă bơcri lơh 250 tơmàn đong bơh priă bơcri dà lơgar mờ ƀòn lơgar dê, lơh tàm bă ù ơnàng mờr 6 lồ tàm thôn 1. Tŭ lơh gơs, hìu bơsram rơp drơng jơnau kờñ bơsram sră, ơm sa bic ai rlau 1 rbô 300 nă kơnòm bơsram là oh kòn làng bol jơi bơtiàn dồ êt nă cau tiah nhàr lơgar in. Sàh Ea Bung geh crơng gơs bơh bơta tơmut bal bơh Ea Bung mờ Ya Tờ Mốt (yau), ù tiah dờng ơnàng, làng bol ơm kis rah rài, broă lòt rê kơnòm bơsram dê, ngan là tàm kàl mìu gam uă kal ke. Broă bơcri priă lơh hìu bơsram ơm sa bic tơn 2 kâp geh kơp kơnờm lơh gơlik bơta tam gơl tàm broă tơnguh cồng nha bơto bơsram tiah nhàr lơgar.

Càr Lâm Đồng bơyai sơn đờm mŭt lơh 3 broă lơh hìu bơsram bàr kấp tàm ală sàh tiah nhàr lơgar là Tuy Đức, Thuận Hạnh mờ Dăk Wil. Pe hìu bơsram ơm sa bic tơn bàr kấp kờp jơh priă bơcri tàm pơgăp 675 tơmàn đong. Bơta dờng broă lơh Hìu bơsram kấp III, mờ ală mpồl hìu ñhoa bơh 1 tus 3 cờn. tơngai lơh bơh nhai 3 nam 2026 tus nhai 8 nam 2027. Tŭ sơn đờm ai ngui, ală hìu bơsram rơ̆p dờp rơlao 4 rơbô nă kơnòm bơsram bơh kấp dùl tus kấp bàr là oh kòn làng bol ờ gal cau tàm tiah do in.

Càr Quảng Ngãi bơyai lơh dơ̆ sơn đờm lam lơh, tờ ù lơh Hìu bơsram ơm sa bic tơn kâp 1 mờ kâp 2 tàm 5 sàh tiah nhàr lơgar là: Bờ Y, Ia Tơi, Ia Đal, Đăk Long mờ Đăk Plô. Kờp jơh priă bơcri lơh 5 hìu bơsram là rlau 1 rbô 100 tơmàn đong. Tơl hìu bơsram geh lơh tàm bă ù ơnàng mờr 5 lồ, drơng ai bơh 700 tus 1 rbô nă kơnòm bơsram in, di mờ bơta geh ngan bơh tơl sàh dê. Ală rơndap broă lơh geh lam lơh jat broă lơh hìu bơsram ơm sa bic tơn kâp 1 mờ kâp 2, gơ jat bal mờ rơndap tap sèng wơl ală hìu bơsram, ơdŭ bơsram, tơrmù ală hìu bơsram dềt, crơng gơs ală hìu bơsram tơrgùm bal. Jơh gùt càr Quảng Ngãi geh bơcri lơh 9 hìu bơsram ơm sa bic tơn kâp 1 mờ kâp 2 tàm ală sàh tiah nhàr lơgar. Tơngai dơ̆ 1, càr neh lam lơh 4 hìu bơsram tàm ală sàh Rờ Kơi, Mô Rai, Sa Loong mờ Dục Nông, kờp dŭ lơh gơs tàm nhai 7 nam 2026. Jơh 5 rơndap broă lơh geh sơn đờm lam lơh tàm tơngai dơ̆ 2 do kờp dŭ lơh gơs tàm nhai 8 nam 2027.