Tàm 10 nam do, ală mpồl Đoàn tàm càr Gia Lai pơgồp bal lơh jat rlau 1 rơbô 500 broă lơh bơt bơtàu, bơnah broă ơruh pơnu tus bal bơt bơtàu ƀòn lơgar pa, tiah drà niam jak; lam lơh mờr 200 broă lơh “Ngai chờ cau lơh sơnơm kơnòm să lơh jat jơnau sồr Wa Hồ dê”, kham kòp, pà sơnơm ờ sa priă ai rlau 50 rơbô nă ơruh pơnu, kơnòm pa tàu mờ kơnòm dềt mờ làng bol geh rài kis kal ke in. Lơh jat sùm geh cồng nha 110 broă lơh ơruh pơnu “2 ờ, 2 geh” tàm hơ̆ tơrgùm ală broă lơh tàm ală sàh pơn đơl pràn lơh ngan lơh sir broă lơh ƀòn lơgar pa mờ lơh geh uă cồng nha pơn rơ ngan... Broă lơh rề ơnàng cau pơn rơ gơguh jak ơruh pơnu kơnòm pa tàu mờ kơnòm dềt pơn rơ jak bơsram mờ lơh jat jơnau sồr Wa Hồ dê neh geh lam lơh làm bă tiah, lơh geh bơta gơn kơnờm nàng ơruh pơnu kơnòm pa tàu mờ kơnòm dềt càr Gia Lai in sơr lèt gan kal ke, lơh tờm să jan mờ sơnđờm mut lơh broă.

Mho òr, Tỉñ đoàn càr Dăk Nông bơyai lơh jờng rơ “Ơruh pơnu gơguh jăk lơh jăt jơnau bơto Wa Hồ” mờ “Đảng viên kơnòm să pơnrơ jăk”. Ală nam do, broă lơh jăt bơsram mờ lơh jăt nùs nhơm, ơnà jăk, broă lơh Hồ Chí Minh dê neh geh ală kấp, ƀộ, đoàn tàm càr lơh mùl màl jơh mờ broă uă broă, gùng dà broă lơh bơceh pa, lơh geh cồng nha. Bơh tŭ hơ̆, geh ngai sơlơ geh uă ơruh pơnu pơnrơ jăk, ală ơruh pơnu geh uă bơta pràn nùs nhơm, geh rài kis niam bơnĕ, sùm lam lài tàm broă bơsram sră, lơh broă, bơceh lơh mờ ai jơh nùs jơh pràn mpồl bơtiàn in. Tàm pơrjum, Tỉñ đoàn càr Dăk Nông neh jờng rơ 28 nă ơruh pơnu gơguh jăk lơh jăt jơnau bơto sồr bơh Wa Hồ dê mờ 17 nă đảng viên kơnòm să pơnrơ jăk càr Dăk Nông tơngai bơh nam 2023 tus 2025. Do là ală cau geh cồng nha jăk ngan tàm bơsram sră, lơh broă, lơh sa, tam dră, kơlôi sơnơng bơta chài, tam gơl bơceh lơh, mŭt lơh broă, bơ̆t bơtàu ƀòn lơgar pa mờ tus bal broă đoàn, broă mpồl dê.