Tus tềng bồ ƀòn Canh Tiến, sàh Canh Vinh, càr Gia Lai, kơno să kơnòm dềt đơs crih tàm hìu bơsram mầm non neh mpong săp tàm gùt brê bơnơm. Tàm ơdŭ bơsram do geh 32 nă kơnòm bơsram, ală kơnòm dềt do chờ hờp ngan tamya jăt jơnau đơs crih geh pờ bơh tàm ti vi pa geh crăp. Săp đơs crih, săp ñŏ kòn dềt geh bal, lơh geh dùl bơta chờ hờp niam bơnĕ ngan.

Oh Đinh Thị An, 8 sơnam chờ hờp đơs: “Lài do kòn lòt bơsram den ờ hềt geh ồs đèng, pa do lòt bơsram neh geh ồs đèng, geh phan puh mờ geh ti vi tai, kòn gŏ pơgru bơto ƀơn ngan wă, geh phan puh tŭ trồ tơngai duh lơh mrềt niam ngan”.

Geh 2 nam tus bơto tàm tiah ngài sà Canh Tiến dê, pơgru Nguyễn Thị Mỹ Trinh, 28 sơnam, tŭ do kung gam gơlơh ngoh rơngăc ngan sơl bè ală tam gơl. Tài mìng pơgăp mờ do ờ jŏ sơl, tiah do gam ờ tơl uă bơta ngan, sền đơs crih tàm ti vi ngăc ngar là bơta mờ pơgru ờ kơlôi geh ngan. Să tờm pơgru Trinh tus bơto tàm 2 nam, pah ngai tus hìu bơsram ndrờm là bơta lòng uă ngan. Gơl gùng jòng 20 kơi sồ bơh hìu tus hìu bơsram ndrờm gơtìp kal ke, gùng kơh ntiar, trồ mìu pal lòt mờ rơkì, lòt gùng rơwềng roh uă ngan tơngai. Mơya tŭ do, pah ngai lòt bơto gơwèt mờ pơgru ndrờm là ngai chờ tài gùng lòt neh geh ƀuơn. “Tŭ geh gùng lòt pa cau pơgru lòt ƀuơn rơlao, phan bơna mờ hìu bơsram geh lơh niam wơl, tŭ geh ồs đèng neh dong kờl cau pơgru bal mờ kơnòm bơsram geh sền ti vi, geh đơs crih mờ sền ală jơnau geh kwơ rơlao, dong kờl cau pơgru bơto niam rơlao”.

Ờ mìng ală cau pơgru bơh tàm tiah ndai tus bơto, uă cau kis bơh dềt tus dờng tàm tiah kal ke Canh Tiến do kung rơwah rê wơl nàng pơgồp bal bơta pràn lơh tam gơl ƀòn lơgar. Pơgru Đinh Thị Trang, 22 sơnam, pa jơh bơsram Cao đẳng lơh pơgru neh jào sră dan bơto tàm ƀòn do. Tŭ do, tơnơ̆ 2 nhai bơto, là cau pơgru atbồ ơdŭ 2C, hìu bơsram kấp 1 Canh Tiến, pơgru Trang neh gŏ loh làng ngan bơta tam gơl, tài ală bơta bơto bơsram niam rơlao mờ ală nam lài uă ngan: “Di lah pơn drờm mờ ală nam lài den nam do geh broă sền gròi bơh Anih duh broă Làng bol sàh, neh ai hìu bơsram in tơl phan nàng bơsram ai kơnòm bơsram in, kơnòm bơsram kung geh gơguh jăk mờ geh tìp bal mờ ală phan ngui bơsram pa rơlao mờ ală kơnòm bơsram ờ gam ờ git bè tŭ sơnrờp tai. Là cau pơgru pal tam pà bal mờ tề lam kơnòm bơsram tus tơl bơta mờ ai uă ngan tŭ nàng sền gròi uă rơlao tus mờ ală kơnòm bơsram, bơto nền nòn rơlao mờ geh bơto bơtơl tai nàng bơh tŭ hơ̆ ală kơnòm bơsram in git wă ală jơnau bơsram jăk rơlao”.

Kơnòm bơsram chờ, pơgru sơlơ chờ rơlao bè ală tam gơl tàm ƀòn lơgar Canh Tiến, sàh Canh Vinh, càr Gia Lai dê. Mơya chờ hờp rơlao là cau mè bèp kơnòm bơsram dê, tài bơta chờ nhơl bơsram sră bơh oh kòn dêt neh geh tơl, mè bèp gơtùi iang nùs lơh broă sa. Lŏ Đinh Thị Yến, geh kòn bơsram tàm hìu bơsram kấp 1 Canh Tiến pà git: “Di lah pơn drờm mờ lài do den tŭ do phan bơna neh geh tơl rơlao, mpồng hìu bơsram geh lơh niam mờ geh ti vi, pơgru pờ nàng kơnòm bơsram in sền ală jơnau bơsram mờ wă kung uă sơl. Gŏ kòn bơsram di lah pơn drờm mờ lài kung jăk rơlao, kòn añ rê tàm hìu git tamya, git đơs crih, git sền sră pơn drờm mờ lài kung jăk rơlao”.

Jăt ồng Dương Hiệp Hoà, Củ tịc Anih duh broă Làng bol sàh Canh Vinh pà git, sàh geh bơcri priă 300 tơlăk đong ai 2 hìu bơsram mầm non mờ kấp 1 in mờ kờp jơh 5 jơdŭ bơsram, dong kờl lơh geh tơl uă ngan broă bơto mờ bơsram. “Mờ nùs nhơm drơng broă làng bol in, ală pơgru kung lơh jăt mờ geh broă bơto bơsram niam di jăt mờ jơnau geh ai. Kơnờm bơsram tàm Canh Tiến chờ hờp ngan, tàm hơ̆ uă ngan là tàm nam bơsram pa do ală kơnòm geh dơ̆ sơnrờp gŏ geh bơyai lơh mŭt bơsram nam bơsram pa, lài do den ờ geh, cau pơgru ai tơngŏ nùs nhơm chờ hờp ngan tài gŏ kơnòm bơsram ờ geh tơl den tàng kờñ bơtơl wơl. Tus do sàh dan rề ơnàng tai nàng lơh niam wơl phan bơna nàng ală kơnòm bơsram in, nàng di pal mờ jơnau kờñ bơto mờ bơsram”.

Tàm gùl brê bơnơm dờng ơnàng, ală ơdŭ bơsram àng ồs đèng tàm Canh Tiến tŭ do ờ mìng là bơta chờ bơh kơnòm dềt dê, mờ là cồng nha bơh ală broă lơh ngan sùm, bơh cau pơgru, bơh gơnoar atbồ sàh bal mờ mpồl bơtiàn dê. Ƀòn Canh Tiến kung bè uă tiah kal ke ndai tàm càr Gia Lai kung gam geh Dà lơgar bơcri priă lơh ndrờm bal, tơl ală bơta nàng tus bal mờ broă bơtàu tơnguh bal bơh gùt lơgar dê tàm rài pa.