Dơ̆ pơrlòng jơh bơsram kâp pe nam do càr Kon Tum geh rlau 5 rbô 300 nă kơnòm pơrlòng cih mat tus bal pơrlòng, tàm hơ̆ geh mờr 1 rbô 800 nă kơnòm pơrlòng jơi bơtiàn dồ êt nă cau. Nàng tơnguh cồng nha dơ̆ pơrlòng mờ khà kơnòm bơsram gơ kờn pơrlòng, tŭ do, ală hìu bơsram tiah sar lơgar ngài, hìu bơsram ơm sa bic tơn bơh càr dê gam mut tàm tơngai dut ndơl bơsram wơl jơnau git wă, bơta chài lơh jơnau pơrlòng ai kơnòm bơsram in. Tàm sap ntas dam dre nrau kàl rlô bơkang, 36 nă kơnòm bơsram bơh ơdŭ 12A3 bơh Hìu bơsram kòn cau ơm sa bic tơn kơnhoàl Tu Mrông dê kung gam lơh ngan bơsram wơl môn Địa lí. Ƀùi bơsram wơl jơnau git wă ngai do ală oh geh pơgru pơlam lơh jơnau lùp pơrlòng sồ 1 bơh Ƀộ Bơto bơtê mờ bơsram càr dê. Oh Y Diễm pà git: “Oh gŏ geh bàr pe bơta kơn jơ̆, pơn yơu bè 2, 3 jơnau lùp pơrlòng mờ pơgru jài geh bàr pe jơnau lùp kung kal ke ngan sơl tàm broă jòi git. Mơya kung geh broă bơsong hơ̆ là lùp pơgru, jòi git tàm internet halà lòt jồm sră tàm hìu prap mờ sền sră nàng jòi git”.

Oh Y Thiệp, kơnòm bơsram ơdŭ 12A2 pà git, oh mờ ală bơyô geh pơgru pơlam neh git kơ̆ jơnau git wă mờ gơ dờp mờ broă lơh pơrlòng pa: “Do là dơ̆ pơrlòng mờ Ƀộ Bơto bơtê mờ Bơsam tam gơl rơndap tap sèng jơnau lùp pơrlòng. Bơtuah ngan dùl bơta là oh neh geh pơgru pơlam mờ neh git rơndap tap sèng pơrlòng bơh nam ơdŭ 11. Ală jơnau pơrlòng ală pơgru ndrờm ai bol oh lơh jat rơndap tap sèng jơnau lùp pơrlòng pa. Pa do ngan rlau jơh là pơrlòng tơrlòng lài jơh kâp pe mờ hìu bơsram kung ai bol oh pơrlòng tơrlòng jat rơndap tap sèng pa. Oh kung neh geh lơh kwèng den tàng kung ờ huan gơtìp kal ke”.

Dơ̆ pơrlòng jơh bơsram kâp pe nam do, Hìu bơsram kâp pe kòn cau ơm sa bic tơn kơnhoàl Tu Mrông, càr Kon Tum geh 110 nă kơnòm pơrlòng cih mat tus bal pơrlòng mờ jơh ală ndrờm là oh kòn jơi bơtiàn dồ êt nă cau. Nàng ală oh in git jơ̆ jơnau git wă, bơta chài lơh jơnau pơrlòng, hìu bơsram neh sac rơ wah kơnòm bơsram gơs 3 mpồl: Mpồl geh pràn jak ờ huan uă, mpồl geh pràn jak di mơ mờ mpồl geh pràn jak uă đau nàng bơsram wơl jơnau git wă. Pơgru Văn Trọng Lưu, Lam bồ hìu bơsram kâp pe kòn cau ơm sa bic tơn kơnhoàl Tu Mrông pà git, tŭ tơngai dut ndơl, hìu bơsram pơn jat tai lời ai bơta sền gròi uă ngan tus broă bơsram wơl jơnau git wă nàng lơh jơnau pơrlòng ai kơnòm bơsram in: “Bol hi pơn jat tai lơh jat ală tơngume bơsram wơl jơnau git wă dồ bă ngan ngồn mờ broă sền sơ wì nàng ală oh geh bơta rơcang lài niam ngan rlau jơh bè jơnau git wă kung bè bơta chài lơh jơnau pơrlòng. Ală oh pal bơsram ngan ngồn rlau, gơtùi git jơnau geh lùp niam rlau nàng lơh jơnau pơrlòng. Mùl màl là pal sền, git tơngume mờ jơnau sồr bơh jơnau lùp dê nàng lơh jơnau pơrlòng. Tàm tŭ tàp lơh jơnau pơrlòng den hìu bơsram kung lơh gơlik bơta niam ngan rlau jơh, sền gròi tus rài kis phan bơna, nùs nhơm ai ală oh mờ pơgru pơlam tàp lơh jơnau pơrlòng in.

Tàm càr Dăk Lăk, Gah Bơto bơtê mờ Bơsram càr Dăk Lăk gam lơh sir ală broă rơcang lài nàng kờñ gàr dơ̆ pơrlòng jơh bơsram kâp 3 nam 2025 geh lơh lơngăp lơngai, nền nòn, di mờ kơrnuat pơrlòng, lơh jat jơnau sồr bè dơ̆ pơrlòng sơn rờp jat jơnau bơto bơsram pe kâp nam 2018. Dơ̆ pơrlòng nam do, càr Dăk Lăk crơng gơs 1 mpồl duh broă pơrlòng mờ 53 anih pơrlòng bal mờ 948 cơldŭ pơrlòng geh rơndap lơh tàm ală hìu bơsram kâp 3 mờ anih tờm bơto bơsram sùm tàm càr. Kờp jơh khà kơnòm pơrlòng cih mat tus bal pơrlòng là rlau 22 rbô 600 nă kơnòm bơsram, tàm hơ̆ geh rlau 530 nă oh là cau pơrlòng khat gơboh rơp tus bal pơrlòng mờ mpồl duh broă pơrlòng is ồn.

Tus tŭ do, broă lơh sền sơ wì mờ rơcang lài phan bơna tàm ală anih pơrlòng neh lơh sir. Broă lơh gàr kloh niam tiah ơm kis, kloh niam phan sa, sơnơm tơmba mờ broă rơndap lơh sền gàr lơngăp lơngai, tam pà gùng lòt kung geh ală gah lơh broă geh gơnoar pơgồp bal lam lơh nền nòn. Bal mờ hơ̆, Sờh Bơto bơtê mờ Bơsram càr Dăk Lăk neh bơyai lơh pờ ală ơdŭ bơto pơlam mờng chài lơh broă ai rlau 2 rbô 200 nă kwang bàng, cau pơgru, cau lơh broă geh sồr lơh broă tàm dơ̆ pơrlòng in. Tơngume bơto pơlam tơrgùm tàm ală bơta pa tàm kơrnuat pơrlòng nam do, pơlam bơsong ală broă gơlik geh tàm tŭ sền pơrlòng, kung bè ngui phầm mềm atbồ pơrlòng, gàr lơh jat di broă rơndap lơh mờ jơnau sồr bè bơta chài măi mok. Mò Lê Thị Thanh Xuân, Kwang lam bồ Sờh Bơto bơtê mờ Bơsram càr Dăk Lăk yal: “Bol hi lam lơh broă lơh bơto pơlam mờng chài lơh broă sền pơrlòng, lùp sền pơrlòng, sền sơ wì pơrlòng lơh jat broă lơh lòt lơh broă tơn mờ pờ tơlik tàm internet tus ală cau pơgru mờ cau lơh broă, ală kwang bàng lơh broă tàm mpồl duh broă pơrlòng nàng tơl nă cau lơh broă in git loh kơrnuat, kơnòl broă nàng gàr geh dùl dơ̆ pơrlòng nền nòn, lơngăp lơngai, song dơpă mờ ring bal”.

Dơ̆ pơrlòng jơh bơsram kâp pe nam do là tềl kuơmàng gơ wèt mờ git nđờ jơt rbô nă kơnòm bơsram tàm càr Kon Tum mờ càr Dăk Lăk, ngan là ală kơnòm bơsram jơi bơtiàn dồ êt nă cau tàm tiah sar lơgar ngài. Bơta rơcang lài, pơn đơl pràn bơh kơnòm bơsram dê bal mờ bơta lơh ngan bơh pơgru mờ gah bơto bơsram dê tàm broă rơcang lài jơnau git wă, bơta chài, phan bơna là bơnàng jă kơ̆ kơljap nàng dơ̆ pơrlòng in geh lơh lơngăp lơngai, nền nòn mờ geh cồng nha niam.