Nàng rơcang lài niam ai ală anih lơh broă, mpồl lơh broă, kâp sàh in lơh broă bơh ngai 01/7 tus do, Tỉñ ủy càr Kon Tum sồr ală Đảng ủy gơ wèt Tỉñ ủy càr; ală Huyện ủy kơnhoàl, Thàñ ủy ƀòn dờng mờ sờh, mpồl, gah broă lơh bơh càr dê tơrgùm uă ngan rlau jơh ai broă lơh gơs broă rơndpa tap sèng mpồl cau lơh broă sră pơ àr gơnoar atbồ; bơsong ală kal ke, kòl yan gơlik geh, gàr mpồl cau lơh broă sră pơ àr gơnoar atbồ lơh broă niam, geh cồng nha. Tỉñ ủy càr Kon Tum jàu ală kâp ủy in kờp sền, lơh sir broă rơndap lơh rơndap cau lơh broă, hìu lơh broă, rơndeh rơndồ, phan bơna… gàr rơcang ai mpồl cau lơh broă sră pơ àr gơnoar atbồ kâp sàh lơh broă bơh ngai 01/7 tus do; Jàu Mpồl Lơh kơnòl broă sùm Đảng ủy Anih duh broă làng bol càr đơng lam, sồr lơh kờp sền jơh bơta atbồ, bơsong hìu lơh broă, phan bơna, ù tiah jơngkah wơl tơnơ̆ tŭ rơndap tap sèng mpồl lơh broă sră pơ àr gơnoar atbồ gàr cồng nha, pleh pơhì pơhà; Duh broă sùm Mpồl duh broă làng bol càr di tŭ ai tơlik Jơnau lơh nền tàm pơrjum tơn pồ Củ tịc, Phó Củ tịc, lam bồ mpồl bơh Mpồl duh broă làng bol kâp sàh dê; Củ tịc, Phó Củ tịc Anih duh broă làng bol kâp sàh nàng lam lơh jàu jơnau lơh nền tàm ngai 24/6 do.

Ƀí thư Đảng ủy ală anih lơh broă Đảng càr Kon Tum ồng Nguyễn Đức Tuy pà git, broă jal mhar sồr tơl nă kwang bàng, cau lơh broă sa priă nhai dà lơgar mờ cau lơh broă pal lơh jăt uă ngan rlau jơh nùs nhơm rơcang lài lơh mờ geh kơnòl nàng mpồl kwang bàng lơh broă kâp sàh, sơnah ƀòn pa lơh broă niam, geh cồng nha.