Kah jơnau bơto Wa Hồ dê “tiah lơi kờñ ơruh pơnu geh, broă lơi kal ke geh ơruh pơnu”, đảng viên Trần Tiến (deh nam 1992), cau jak broă Cơldŭ Ătbồ Tơrgùm- Pang sră- Sră, Sền gàr rềs àr mpồl bơtiàn càr Dăk Lăk neh tă pơgồp jơnau đơs, lam lơh ală broă lơh ơruh pơnu wèt tus ală ƀòn lơgar krơi is tàm càr. Bi uă dơ̆ tàm tơrbŏ lam lơh ală broă lơh pơgồp bơnah prăp gàr, lơh gơrề uă ală bơta kwơ niam chài làng bol jơi bơtiàn dồ êt nă cau dê, bè lơh niam wơl, pơs wàs dà mbòr, tơngguh uă gĭt wă sền gàr sàng goh tiah ơm kis ai làng bol in; pà phan, dong kờl priă tă bơto yal dròng cing ai ƀòn lơgar tiah nhàr lơgar in. Bal mờ hơ̆, bi Tiến neh jòi lùp, lơh pràn jăt ngui tam gơl sồ tàm lơh jăt kơnòl broă broă mờng lơh, geh broă broă lơh tơrlòng lài pa, broă lơh bơceh lơh nàng dong kờl làng bol crăp, ngui ală jăt ngui pờ tơn tàm internet, ai tơl bơta ƀươn ală tŭ tăc blơi mờ ngui ală drơng broă bè sền gàr rềs àr mpồl bơtiàn. Đảng viên Trần Tiến yal: “Añ là đảng viên kơnòm să, kung geh sơl ci ƀộ ai tơl bơta sùm dờp lơh pe jơnau mìng dùl tơngume cribơyai, geh tơl bơta jòi lùp jrô rlau bàr pe jơnau mìng dùl tơnggume loh làng bơh broă bơsram mờ lơh jăt Wa Hồ. Añ sùm lơh ngan jơh pràn tài broă lơh bal, tàm lơh kơnòl broă broă mờng lơh den añ bơsram Wa Hồ uă ngan rlau jơh tàm nùs nhơm bơsram is, sùm lùp bơsram nàng tơngguh uă bồ tơngoh jak chài să tờm in”.

Gơ wèt mờ bi Nguyễn Thùy Trang, deh nam 1992, Ƀí thư Đoàn sơnah ƀòn Ea Tam, ƀòn dờng Buôn Ma Thuột, bulah tàm sơnam lơh, gơnoar broă lơh, bi kung gĭt wă loh gơnoar broă, kơnòl broă bơh kwang bàng dê. 23 sơnam neh là Phó Củ tịc Mặt trận Dà lơgar Việt Nam sơnah ƀòn kơnòm să ngan rlau jơh càr Dăk Lăk dê. Bơh tŭ tam gơl tus lơh mìng kơnòl broă Đoàn lơm, bi neh hòi jà lơh 7 broă bơ̆t bơtàu ơruh pơnu, lam lơh uă broă lơh sền gàr lơngăp lơngai rài kis mpồl bơtiàn, jơh nùs tus bal hòi jà ơruh pơnu lòt ling is, dong kờl ơruh pơnu sơnđờm mŭt lơh broă jòi broă lơh, tàm tơrbŏ ơruh pơnu tus bal ală broă lơh sền gàr mờ prăp gàr niam chài ờs mờng bơh yau ală jơi bơtiàn. Bơh hơ̆, lơh geh bơta tàm tơrbŏ, lơh jăt niam gơnoar broă ơruh pơnu dê tàm kâp hơđơm. Bi Nguyễn Thùy Trang, pà gĭt: “Bơh ală dơ̆ hòi jà kung bè bơsram bè Wa Hồ den să tờm bơsram geh tàm Wa ală nùs nhơm pơndềt să, tơryăng tơryồng, kong bòl glar kal ke mờ pal sùm yờ tơngguh uă kơnòl să tờm dê tàm lơh jăt kơnòl broă geh jàu bơh ală kâp dê. Sàng goh dòn song, lơh jăt tơl jơnau sồr mờ jăt di bơta pal jăt bơh mpồl dê nàng lơh gơlik geh bơta gơrềng rềp ngan rlau jơh đah Đảng mờ Làng bol mờ tàm kwang bàng mờ đoàn viên, ơruh pơnu”.         

Cih dờp lơh ngan, tă pơgồp bơh ală đảng viên kơnòm să dê, pa do, Tỉñ đoàn càr Dăk Lăk neh bơyai lơh jờng rơ 33 nă đảng viên kơnòm să pơnrơ ngan tus bơh ală kơnhoàl, ƀòn drà dờng, ƀòn dờng mờ ală mpồl lơh broă gơ wèt tàm jơh gùt càr. Do ndrờm là ală cau nă să is pơnrơ ngan tàm uă broă, bè: bơsram- kơlôi sơnơng jak chài, bơtàu tơngguh lơh sa- sơnđờm mŭt lơh broă, broă lơh đoàn- hội, sền gàr dà lơgar- lơngăp lơngai, bơ̆t bơtàu ƀòn lơgar pa mờ sền gàr tiah ơm kis. Geh jờng rơ tàm dơ̆ do, bi Phạm Thị Thu Thảo, Ƀí thư Đoàn hìu bơsram Kâp pe Buôn Hồ, ƀòn drà dờng Buôn Hồ, càr Dăk Lăk, yal: “Añ gŏ chờ hờp ngan mờ pơñiờ să ngan, tàm rài brồ să do, gơ wèt mờ să tờm añ là dồ nă đảng viên, dồ nă cau lam bồ đoàn den oh gŏ gơnoar broă he dê rơ̆p là dang tê pràn ngan nàng dong kờl bal dà lơgar ngai sơlơ bơtàu tơngguh rlau”.

 “Tiah lơi kờñ ơruh pơnu geh, broă lơi kal ke geh ơruh pơnu”- jơnau bơto bơh Wa Hồ dê bơh jŏ neh gơgơs gùng sơñio lơh broă ai uă đảng viên kơnòm să in tàm gùng lòt tă pơgồp ơn pơdơng. Tàm càr Dăk Lăk, ală đảng viên bè Trần Tiến, Nguyễn Thùy Trang halà Phạm Thị Thu Thảo neh mờ gam đơs nền gơnoar broă lam lài tàm tơl broă, bơh broă lơh broă mờng lơh tus lơh broă Đoàn, bơh sền gàr rài kis niam chài is jơi bơtiàn dê tus tam gơl sồ drơng làng bol in. Khi ờ mìng bơsram Wa Hồ tàm nùs nhơm geh kơnòl lơm, bơsram is mờ pơndềt să, mờ gam ai ală bơta kwơ hơ̆ gơgơs broă lơh loh làng, geh kwơ ngan tàm rài kis, lơh gơrề nùs nhơm kis niam- kis geh kwơ tàm mpồl bơtiàn.            

Broă lơh jờng rơ đảng viên kơnòm să pơnrơ ngan là tŭ nàng Tỉñ đoàn càr Dăk Lăk pơn jăt tai lơh kah wơl nùs nhơm ơn pơdơng tă pơgồp, bồ tơnggoh kơ̆p kờñ ngan brồ guh tàm đoàn viên, ơruh pơnu; pơgồp bơnah bơ̆t bơtàu mpồl Đoàn pràn kơnhăp, lơh jăt niam gơnoar broă rơnàng kơnòm să dê tàm broă lơh bơ̆t bơtàu mờ sền gàr Dà lơgar. Bơ̆t bơtàu Dăk Lăk ngai sơlơ bơtàu tơngguh, pas sơm, pa ngan.