Tus bal dơ̆ tơngkah kir sơnrai geh ồng Nguyễn Trọng Nghĩa, Lam bồ Mpồl Mblàng yal bơto bơtê Dà lơgar; mò Võ Thị Ánh Xuân, Phó Củ tịc lơgar bal mờ kwang đơng lam bồ ală Ƀộ, mpồl, gah broă, mpồl cau Dà lơgar dê.

Đơs tàm dơ̆ bơyai lơh, ồng Nguyễn Trọng Nghĩa sồr càr Bình Định mờ ală càr gơwèt Liên khu V pơn jat tai sơlơ tơnguh tai lơh broă bal, tam klăc  bal geh cồng nha rlau tai; lơh jat niam broă lơh “Kis gĭt jơnau gĭt adat”, “Hùc dà kah tô dà”, lam lùp còp, kah ưn ngài, jờng rơ ală hìu bơnhă geh sră dong kờl Dà lơgar, cau pròc mhàm mờ kwang bàng, cau ling, làng bol mờ kơnòm bơsram tơrgùm tus tiah đah Tô Dà lơgar. Mơkung sồr pal lơh pràn mblàng yal jrô ơnàng làm uă bè gơtha broă lơh kah yau do dê tàm jơh gùt Đảng, jơh gùt ling klàng, jơh gùt làng bol, ngan là rơnàng kơnòm să in, đơs nền bơta đơng lam di ngan bơh Đảng, Củ tịc Hồ Chí Minh mờ bơta phi să, tă pơgồp dà kơl hề dờng màng bơh ală rơnàng lòt lài. Broă đòm jat ală jơnau bơsram bơh broă lơh tơrgùm lòt tus tiah đah Tô Dà lơgar pal pơgồp bal mờ broă lơh bơt bơtàu, pơlam tàp rơnàng kăc màng tàm pơrdờn tai in, lơh geh jơnau kờñ ngai sơlơ uă tàm tơngai tam gơl pa mờ bơtàu tơnguh.