Tàm tiah kềng gah dà lềng càr Dăk Lăk dê neh geh mìu mờ kơnàs bơh mang ngai 08/11. Tềng đăp jơnau yal lài mìu dờng rơ̆p gơguh tai, làng bol tàm ală tiah thòng tiah lơyah kềng gah dà dờng Ba, dà dờng Bàn Thạch mờ dà dờng Cái neh lơh jơh ală hìu drơng sền pleh dà lìu. Hìu geh priă den lơh dra kơ̆ kơl jăp, hìu kal ke rlau den kung ngui mpàn chi, lơh anih ơm tàm anih jơnhoa ngan rlau jơh tàm hìu. Ồng Nguyễn Chánh Hướng, ơm tàm ƀòn Chùa, thôn Ngọc Phước, sơnah ƀòn Tuy Hoà, pà gĭt:

"Đơs bal tŭ do cau lơi kung lơh dra pleh dà tih dà lìu lơm, ngòt ngan rao bờh. Hìu lơi geh ƀào ni lông den ndơl wơl, ai kòi den cèng dăp jơh tềng dra”.

Tơnơ̆ dơ̆ dà lìu nam lài lơh gĭt nđờ rơhiang tấn kòi gơtìp aniai, nam do, làng bol sền gròi ngan sền gàr kòi sơntìl mờ phan sa ơn prăp. Kòi geh ơn tàm uă tăp ƀào ni lông, kơ̆t ndơ̆p mờ jun tus tềng anih jơnhoa. Rơndeh măy, măy mŏk phan ngui điện tử, àu mpha, kơmùng ồi tơ̆…kung klơm ndơ̆p jơh mờ ƀào ni lông nàng ờ huan gơtìp aniai tŭ dà gơlìu tus tàm hìu. Tàm ală kơnhoàl ù tiah geh pơhìn ngơr bam jrô dà, gơtìp dà wềl, uă hìu bơnhă neh rơcăng lài rơcăng ală phan ngui sa kờñ pal geh nàng tơl ngui bơh 5 tus 7 ngai. Ồng Trần Tấn Mạnh ơm tàm sàh Tây Hoà, pà gĭt:

“Rơcăng bơh dà hùc tus ală bơta phan sa, prăp ơn tềng anih jơnhoa rañ rơsơh nàng ờ gơtìp rơmơ̆p ndơl tàm tŭ mìu càl rbŭt dờng mờr tus”.

Bơh bơta rơcăng lài bơh tơl hìu bơnhă dê tus broă rơndăp lơh bơh gơnoar ătbồ ƀòn lơgar dê, jơnau đơs “4 dùl bă tiah tơn” pơn jăt tai geh gĭt nền là kơnòl broă tờm kwơmàng. Mpồl Sồr Rơcăng gàr lài broă làng bol càr Dăk Lăk sồr ală ƀòn lơgar geh broă rơndăp lơh di mờ bơta is rơmis tơl tiah, tơl bơta pràn trồ tiah lơh aniai dê. Ồng Đỗ Hữu Huy, Chủ tịch Anih duh broă Làng bol càr Dăk Lăk đơs sùm kơnòl bơh gơnoar ătbồ kâp hơđơm dê tàm lam drơng wơl mờ trồ tiah lơh aniai:

"Añ sồr là puan dùl bă tiah tơn: Sồr lơh dùl bă tiah tơn, mpồl cau dùl bă tiah tơn, phan ngui măy mŏk rơndeh rơndồ dùl bă tiah tơn mờ dong kờl dùl bă tiah tơn, rơndăp bè lơi geh broă rơndăp lơh gơ in wil tơl. Chủ tịch Anih duh broă Làng bol ală sàh sơnah ƀòn là cau kong kơnòl tơl làm, pal să tờm sồr lơh tàm tiah gơbàn tơn. Jàu lơh broă sàh ơm rềp tơl thôn, tơl tiah drà pơhìn uă”.

Trồ tiah ngai sơlơ gơbàn ờ ƀươn soh, ờ chài ngan gĭt lài. Bơta rơcăng lài bơh tơl hìu bơnhă, bal mờ broă rơndăp lơh drơng wơl rơcăng lài bơh gơnoar ătbồ kâp hơđơm dê, rơ̆p pơgồp bơnah tơrmù ƀà jơnau gơtìp rơmơ̆p ndơl, gơmù bơta kơn jơ̆ ai mpồl dong kờl rềs àr in mờ tơrmù ƀà hoàc hươr tŭ mìu dà tih dà lìu gơbàn.