Tổng Bí thư, Chủ tịch lơgar đơs niam ală broă bơcri priă kă bro geh cồng nha bơh ală tập đoàn, mpồl lơh sa kă bro lơgar Nhật Bản tàm lơgar Việt Nam tàm ală nam do. Tổng Bí thư, Chủ tịch lơgar sồr, ală tập đoàn dờng lơgar Nhật Bản ờ mìng rề ơnàng broă kă bro, mờ pơn jăt tai là mpồl lơh sa pin dờn, jŏ jòng, bal mờ lơgar Việt Nam bơtàu tơnguh phan bơna măi mok, năng lượng, bơta niam kă bro uă gah broă mờ ală mpồl geh kwơ pa tàm lơgar Việt Nam.

Tổng Bí thư, Chủ tịch lơgar pà git, lơgar Việt Nam gam mŭt tàm tơngai bơtàu tơnguh pa, lơh ngan lơh jăt jơnau kờñ gơs lơgar bơtàu tơnguh, geh priă uă tàm nam 2045. Nàng lơh geh mùl màl jơnau kờñ do, broă hòi jà ală bơta pràn nàng bơtàu tơnguh phan bơna kwơ màng, năng lượng, jăk chài măi mok, tam gơl tơlir mờ tơnguh uă bơta pràn tàm pơrlòng bơh lơh sa dê là dờng ngan. Lơgar Việt Nam pơn jăt tai lơh gơs kơrnoăt boh lam, tơnguh tiah bơcri priă kă bro; gàr kơl jăp lơh sa dờng, sền gàr gơnoar mờ bơta kwơ di pal bơh ală cau bơcri priă, ai tơl bơta ƀuơn nàng ală mpồl lơh sa kă bro ală lơgar lơh broă geh cồng nha, jŏ jòng tàm lơgar Việt Nam.