Gơnoar atbồ ală ƀòn lơgar gam jal mhar lam lơh ală broă lơh drơng wơl, tơngkah lài làng bol rơcang lài gàr niam lơngăp lơngai. Tàm càr Dăk Lăk, mìu dờng lơh bàr pe tiah làng bol ơm kis tàm sàh M’Drăk gơtìp ngơr bam uă. Gơnoar atbồ mờ ală thôn, ƀòn neh lam lơh lòt sền, dong kờl làng bol ntrờn phan bơna, hòi jà ală hìu bơnhă tàm tiah ngòt rơngơt ntrờn tus tiah lơngăp lơngai.

Tàm sàh Cư Prao, mìu dờng lơh gơbàn ngơr bam uă tàm ală rbàng lìu. Kwang àng sàh neh tồt ƀàng tơngkah lài, dang che kơryan ờ ai cau mờ rơndeh rơndồ lòt gan ală tiah ngòt rơngơt. Mìu dờng jŏ jòng lơh gơguh tai jơnau pơhìn dà tih dà lìu tàm ală dà dờng, dà croh, dà kŏ dà cò, tơrlah ù mờ ngơr bam tàm tiah thòng, tiah lơyah. Gơnoar atbồ ală ƀòn lơgar sồr làng bol bañ lòt gan rbàng, rbàng lìu, tiah ngơr bam jrô halà geh hiòng dà hòr ñhang, lơh jat niam ală jơnau tơngkah lài, bañ sơrlèt is pơng gàr kơryan.

Anih duh broă Làng bol sàh Canh Vinh, càr Gia Lai kơryan ờ ai ing cau mờ rơndeh rơndồ in lòt rê gan kuèl Nha Sam tơnơ̆ tŭ gŏ tềl rơđàng ù tềng hơđăng rơkàng gah gùng tài bơh mìu dờng tàm ală ngai do. Dilah mìu pơn jăt tai jŏ jòng, ù digơlan gơ thâm tàm dà, lơh rơkàng kơh ờ kơ̆ mờ lơh ù lŭ tơrlah gơdùh tàm măt gùng. Gơnoar ătbồ ƀòn lơgar neh geh sră kơryan ờ ai cau lòt jơng mờ jơh ală rơndeh lòt rê tàm gơl gùng do. Kwang àng sàh Canh Vinh pơgồp bal mờ mpồl cau lơh broă ling klàng rơndăp anih kơryan, yal tơngkah lài mờ pơlam tam pà gùng. Bal mờ Canh Vinh, tŭ do, uă ƀòn lơgar tàm càr Gia Lai gam geh pơhìn tơrlah mờ ngơr bam jrô dà kŏ. Mùl màl, sàh Tây Sơn gĭt nền geh 8 kơnhoàl ù tiah geh pơhìn ngơr bam jrô dà kŏ mờ 11 gơl gùng digơlan gơbàn ngơr bam dà. Tàm sơnah ƀòn Quy Nhơn, rlau 30 hìu làng bol tàm kơnhoàl ù tiah bơnơm Một kung pal ntrờn nàng gàr niam lơngăp lơngai; sàh Đề Ghi ntrờn 33 hìu mờ 111 nă cau tàm bàr thôn Đức Phổ mờ Cát Khánh lik bơh kơnhoàl ù tiah geh pơhìn tơrlah tềng jơng bơnơm Gành.