Broă rơndap tap sèng do jat tàm ală bơta bè bă ù rềp bal, bơta ndrờm bal bè bơhiàn kis, ƀuơn ƀuài lòt rê, gàr niam lơngap lơngai dà lơgar mờ bơtàu tơnguh lơh sa mpồl bơtiàn. Tàm kơnhoàl Chư Prông geh 18 mpồl lơh broă sră pơ àr gơnoar atbồ, tơnơ̆ tŭ tơmut bal mìng gam 6 sàh, tàm hơ̆ sàh Ia Pia geh crơng gơs bơh bơta rơndap tap sèng bơta geh ngan bè ờs 3 sàh Ia Pia, sàh Ia Ga mờ sàh Ia Vê.

Ồng Siu Khlo, Ƀí thư Đảng ủy sàh Ia Vê, kơnhoàl Chư Prông pà git, kơnờm lơh niam broă lơh mblàng yal den tàng làng bol git wil tơl jơnau yal bè jơnau lơh nền tơmut bal bơh càr tus sàh mờ tam gơl gơs broă lơh gơnoar atbồ 2 kâp: “Tŭ he mut tàm ală ƀòn, tìp làng bol den kung git bơta kơlôi sơnơng khi dê bè broă tơmut bal ală anih lơh broă dà lơgar, làng bol ring bal uă ngan mờ jơnau lơh nền do. Kuơmàng là jơnau lơh nền bơt bơtàu broă lơh gơnoar atbồ 2 kâp (sang tĕ kâp kơnhoàl). Gŏ là broă tơmut bal do tài bơta kuơ bal den làng bol ring bal ngan, ờ geh tềl tơnggŏ dră wơl jơnau lơh nền tơmut bal ală anih lơh broă, mpồl lơh broă. Làng bol kờñ ngan, ring bal dồ nùs mờ rơp lòt bal mờ Đảng, Dà lơgar he dê”.