Rơndăp tăp sèng mpồl lơh broă sră nggal gơnoar atbồ, càr Lâm Đồng bơh 137 mpồl lơh broă sră nggal gơnoar atbồ kấp sàh gơmù gam 51 sàh, sơnah ƀòn, gơmù 86 mpồl lơh broă sră nggal gơnoar atbồ, drờm mờ rlau 62% (ờ kờp 2 sàh Ninh Gia, kơnhoàl Đức Trọng mờ sàh Bà Gia, kơnhoàl Dà Oai dê lời wơl bè ờs).

Tŭ do, càr kung gam gơ jal rơndăp tăp sèng mpồl lơh broă tơmŭt bal 3 càr Lâm Đồng, Bình Thuận mờ Dăk Nông gơ gơs càr pa jat Jơnau lơh nền tàm pơrjum bơh Mpồl duh broă Đảng Dà lơgar dê. Tơnơ̆ tơmut bal, càr Lâm Đồng pa geh bă ù ơnàng 24 rơbô 233 kơi sồ vuông, khà kờp làng bol mờr 3 tơlak 300 rơbô nă cau, là càr ơnàng ngan rlau jơh gùt lơgar dê. Tàm tŭ rơndăp tăp sèng, càr Lâm Đồng kờp dŭ tus jơh nhai 12/2025 geh 1 rơbô 097 nă kwang bàng, viên cứk, cau lơh broă tàm càr rlô lơh broă. Càr kờp dŭ tă rlau 1 rơbô 140 tơmàn đong priă dong kờl broă lơh ai khà kwang bàng do in, jat Jơnau lơh nền bơh Cíñ phủ dê sồ 178 nam 2025.