Jăt broă rơndăp lơh bơh Dà lơgar dê, tus do, ală càr Lâm Đồng, Bình Thuận mờ Dăk Nông rơ̆p tơrgùm bal gơs càr Lâm Đồng pa, hìu lơh broă sră nggal càr pa dê geh lơh tàm ƀòn dờng Dà Làc, càr Lâm Đồng. Kờp dŭ rơ̆p geh mờr 2 rơbô nă kwang bàng, kông cứk, viên cứk bal mờ cau lơh broă bơh càr Dăk Nông ntrờn tus ƀòn dờng Dà Làc nàng lơh broă.

Bơh broă sền, geh di pơgăp 20% tàm khà cau do geh nùs nhơm kơ̆p kờñ lơh broă jăt tiah di lah geh kấp geh gơnoar ai. Gơrềng tus broă rơndăp tăp sèng mpồl lơh broă càr Lâm Đồng dê tơnơ̆ tŭ tơrgùm bal, kờp dŭ rơ̆p dờp geh mờr 7 rơbô 750 nă cau lơh broă tàm mpồl lơh broă sră nggal bơh ală càr lài mờ tŭ tơrgùm bal. Tŭ do, Mpồl duh broă tơrgùm bal càr pa neh lơh ală gùng dà broă dong kờl rơndeh lòt, hìu ơm… nàng dong kờl mpồl kwang bàng, kông cứk, viên cứk mờ cau lơh broă iang nùs kơl jăp rài kis, tŭ lơi kung rơcang dờp kơnòl tàm anih lơh broă pa.