Tơnơ̆ 4 nam lơh jăt, bơdìh mờ ală cồng nha neh lơh geh, broă lơh jăt adăt boh lam tàm càr Lâm Đồng kung gam geh ờ uă bơta lơh ờ pràn. Broă mblàng yal, ai jơnau pơgồp bal, lòt sền, jăt sền mờ bơsong jơnau dan ờ hềt geh lơh sùm; broă lơh bơh Mpồl Lùp sền làng bol, Mpồl Jăt sền bơcri priă tàm mpồl bơtiàn ờ hềt ndrờm bal. Pal kah ngan, broă tus bal bơh làng bol dê tàm ờ uă broă lơh gam ờ pràn, tàm tŭ jơnau geh ai bè broă lơh glài gơwèt mờ broă lơh tìs mờ kơnòl broă loh làng, lơh kal ke broă jăt sền ha là ờ lơh jăt jơnau dan tơnơ̆ mờ jăt sền ờ hềt mùl màl.

Kal ke ai tơngŏ loh làng tàm ală ƀòn lơgar tơnơ̆ mờ tơmŭt bal thôn, jơnum làng bol tiah drà. Tŭ khà hìu làng bol gơguh, broă bơyai lơh pơrjum mờ ai jơnau pơgồp bal tơn pal geh uă ngan tơngai, cau lơh broă bal mờ gùng dà broă lơh di pal. Ồng Nguyễn Văn Dũng, Phó Chủ tịch Anih duh broă Làng bol sàh Hiệp Thạnh, càr Lâm Đồng pà git: “Ù tiah bol añ tơnơ̆ mờ tŭ tơmŭt bal gơmù 50% mìng gam 9 thôn. Mơya, khà kờp làng bol gal ngan, tàm pơgăp 54 rơbô nă, thôn ờ gal ngan là rơlao 800 hìu, den tàng broă bơyai lơh ai jơnau pơgồp bal ha là ală tơngu me pơrjum tơn mờ làng bol gơtìp kal ke ngan. Dơ̆ tĕ khà cau lam bồ thôn pa do bè đah sàh bol añ lơh jăt adăt mờ jăt jơnau geh ai bơh càr dê, hơ̆ là broă bơyai lơh tĕ khà geh làng bol lơh. Tơngu me sơnrờp ngan là pơrjum nàng ai jơnau đơs pơgồp bal bơh làng bol dê tơn. Mơya ờ tơl. Thôn geh di pơgăp 1 rơbô hìu jà làng bol tus uă ngan geh 100 hìu tus mơ”.

Mùl màl do pà gŏ, lơh jăt broă làng bol lơh tờm tàm ƀòn lơgar ờ mìng là broă bơyai lơh ală dơ̆ pơrjum di jăt jơnau geh ai, mờ gam pal gàr niam làng bol geh tơl bơta niam nàng tus bal, pơgồp bal jơnau đơs mờ ai geh ală broă gơwèt gơnăp gơnoar. Tŭ gùng dà broă bơyai lơh ờ hềt gơdờp bal mờ khà kờp làng bol mờ ù tiah tơnơ̆ mờ tơmŭt bal, broă tơnguh gơnoar lơh tờm bơh làng bol dê rơ̆p gơtìp kal ke.

Bơh tàm mùl màl ƀòn lơgar dê, càr Lâm Đồng dan tam gơl, bơtơl ală jơnau geh ai nàng gàr geh jơnau ring bal tàm broă lơh jăt broă làng bol lơh tờm tàm mpồl lơh sa kă bro; lơh geh phần mềm bal, ring bal khà broă, broă lơh mờ di jơnau tơngit nàng ală ƀòn lơgar ngui, tơrbŏ bal mờ mpồl Dà lơgar dê. Càr kung dan mờ Bộ Dơlam is lơh geh pang sră bơto sồr mờ bơto bơtơl broă lơh ai mpồl lơh broă tàm gah do in tơn.