20 sàh lơh lài geh săc rwah tàm khà 51 sàh kal ke ir bơh càr Dăk Lăk dê. Tàm hơ̆, 14 sàh geh bơh 7 broă jàu kal ke ir rlau hơđăng, geh uă kal ke bè phan bơna bơ̆t bơtàu, lơh sa mờ drơng broă sa priă kờñ pal geh. Ală jơnau neh lơh nền geh jơnau kờñ tus nam 2030, tơl sàh geh êt ngan là bơh dùl broă lơh tơrlòng lài lơh sa tơlir halà lơh sa lơh jơh ală broă, dùl mpồl lơh bal lơh sa, lơh gơlik phan mờ tăc blơi; pơgồp bal bơtàu tơngguh lơh sa mờ prăp gàr niam chài, lơh niam wơl tiah ơm kis.

Jơnau kờñ priă jền digơlan pơgăp 5 rbô tơmàn đong, geh pơgăp 3 rbô tơmàn đong hòi tơrgùm tàm ƀòn lơgar mờ mpồl bơtiàn tă pơgồp, pơgăp 2 rbô tơmàn đong bơh kes priă càr. Broă ai priă loh làng gơ jăt tàm jơnau tơl pràn tàm pơnring kes priă mờ hòi tơrgùm ală bơnah priă dipal mờ adăt boh lam.

Tàm pơrjum, đơng lam ală sờh gah mờ ala măt ală sàh neh dan geh ală gùng dà broă rơndăp lơh nàng ală jơnau neh lơh nền gờñ geh lam lơh tàm mùl màl. Ồng Nguyễn Duy Tính, Chủ tịch Anih duh broă Làng bol sàh Phú Mỡ, càr Dăk Lăk dan gờñ geh pơlam bè măt broă ai lài mờ kơrnoăt pơgồp bal priă nàng rơcăng lài rơcăng bơcri tơn bơh bồ nam 2027.

“Tơrgùm bơ̆t bơtàu phan bơna bơ̆t bơtàu, mùl màl bè ală broă bơ̆t bơtàu pà dà ai ală thôn làng bol jơi bơtiàn dồ êt nă cau in. Tơrgùm bơ̆t bơtàu ală tiah rơha làng bol ai ală thôn làng bol jơi bơtiàn dồ êt nă cau in. Pà ală phan bơna ai ală klờng in, ngan là ală klờng jơi bơtiàn ơm sa bĭc tơn ai ală kơnòm bơsram in”.

Tàm tŭ hơ̆, Sờh Jơi bơtiàn mờ Pin dờn Jăt yàng càr Dăk Lăk dê sồr ală sàh săc rwah kơnòl broă di ngan mờ jơnau kờñ, ngui niam bơta ƀươn bè lơh sa, broă lơh ờs mờng bơh yau mờ lòt nhơl gơ jăt bal mờ niam chài ƀòn yau. Tơl nơm broă lơh tơrlòng lài pal geh broă rơndăp lơh lơh sùm tơnơ̆ tŭ dong kờl.

Đơs pơndŭt pơrjum, ồng Y Nhuân Byă, Phó Chủ tịch Anih duh broă Làng bol càr Dăk Lăk sồr ală sờh, gah mờ ƀòn lơgar sền swì gĭt nền loh broă, tơngai lơh pah nam, pơgồp bal ai priă jền, pleh tàm rơndăp tàm rơndồl đah ală broă. Tềng đăp măt, tơrgùm rơcăng ală jơnau sồr lơh tàm nam 2027, ai lài phan bơna bơ̆t bơtàu kờñ pal geh.

 “Lam lơh jăt ală jơnau neh lơh nền pơn jăt bal mờ bơtàu tơngguh lơh sa, lơh li la ală broă lơh tơrlòng lài lơh jăt, is ồn là tơngguh uă priă lơh geh, bơtàu tơngguh rài kis làng bol dê. Bè hơ̆, khà hìu rƀah kung là dùl tàm ală broă jàu kwơmàng ngan sơl. 20 sàh geh rwah den kờñ pal rơcăng lài kờp sền wơl, sền swì gĭt nền jơnau kờñ loh làng mờ jơnau dan dipal”.