Drim do 17/06, tàm Hà Nội, Hìu bơsram kơlôi sơnơng Cíñ trị dà lơgar Hồ Chí Minh bơyai lơh Pơrjum dờng tàm pơrlòng gơboh lơgar dơ̆ VI tơngai bơh nam 2025- 2030. Tus bal pơrjum dờng, Phó Củ tịc lơgar mò Võ Thị Ánh Xuân, Phó Củ tịc dơ̆ dùl Mpồl duh broă tàm pơrlòng pà khà jờng Dà lơgar; bal mờ 193 nă cau ala măt là ală cau pơnrơ gơguh jak tàm srơh tàm pơrlòng gơboh lơgar tơngai bơh nam 2020- 2025 bơh Hìu bơsram kơlôi sơnơng dê mờ ală hìu bơsram cíñ trị, ƀòn dờng gơ wèt Dà lơgar tus bal Pơrjum dờng. Đơs sơnđờm mŭt Pơrjum dờng, Tiến sìh ồng Nguyễn Duy Bắc, Phó Kwang Lam bồ Duh broă sùm Hìu bơsram kơlôi sơnơng cíñ trị dà lơgar Hồ Chí Minh pà gĭt, Pơrjum dờng nàng kờñ wèt tus chờ gờm Pơrjum dờng Đảng gùt lơgar dơ̆ XIV, Pơrjum dờng tàm pơrlòng gơboh lơgar gùt lơgar dơ̆ XI, Pơrjum dờng Đảng ƀộ Hìu bơsram kơlôi sơnơng dơ̆ XV tơngai lơh broă bơh nam 2025- 2030.

Lơh jăt jơnau bơto Củ tịc Hồ Chí Minh kờñ gơboh dê “Tàm pơrlòng là gơboh lơgar, gơboh lơgar den pal tàm pơrlòng” mờ “broă lơh pah ngai hơ̆ là bơnàng jă bơh tàm pơrlòng dê”, bơh bơta đơng lam Đảng dê, uă srơh tàm pơrlòng gơboh lơgar neh geh lam lơh. Đảng mờ Dà lơgar sùm sền dờng màng gơnoar broă bơh broă lơh tàm pơrlòng, pà khà jờng dê, sền do là gùng dà đơng lam Đảng dê, phan ngui ătbồ Dà lơgar mờ là bơta gơn kơnờm dong kờl lơh gơs jak ngan kơnòl broă cíñ trị.