Tàm hơ̆, pal kah ngan là broă tus bal Anih cri bơyai Lơh sa đah lơgar Việt Nam mờ càr Hokkaido mờ wă Kwang atbồ càr Hokkaido.

Đơs tàm Anih cri bơyai Lơh sa đah lơgar Việt Nam mờ càr Hokkaido, Phó Thủ tướng ồng Nguyễn Chí Dũng đơs nền, bơta git gơ̆p lơh sa đah bàr gah kung gam uă bơta bơtàu tơnguh, mờ ai geh ờ uă jơnau pơlam gơwèt mờ gơnoar atbồ bal mờ mpồl bơtiàn mpồl lơh sa kă bro đah bàr gah dê bè: tơnguh broă lơh bal lơh sa, niam chài đah càr Hokkaido mờ ală càr, ƀòn dờng tàm lơgar Việt Nam, kơlôi sơnơng gờñ pờ gùng par song tơn tơrbŏ càr Hokkaido mờ ală càr, ƀòn dờng tàm lơgar Việt Nam. Phó Thủ tướng đơs nền tai, Cíñ phủ lơgar Việt Nam hơ sùm lơh broă bal, ai tơl bơta ƀuơn nàng ală cau bơcri priă tàm lơgar mờ lơgar bơdìh in, tàm hơ̆ geh ală cau bơcri priă lơgar Nhờk mờ càr Hokkaido, bơcri priă kă bro kơl jăp, geh cồng nha, jŏ jòng tàm lơgar Việt Nam.