Bi Siu Pôp, kòn cau Jarai ơm tàm ƀòn Anh, sàh Ia Bang, kơnhoàl Chư Prông, càr Gia Lai là cau lơh phan tàm anih dờng lơh broă sa suơn sre Hoà Bình, Kông ty kau su Chư Prông pà git, mpồl lơh broă geh rlau 206 nă cau lơh phan là cau jơi bơtiàn dồ êt nă cau, geh mờr 92% tàm kờp jơh khà cau lơh broă bơh anih suơn dờng lơh broă sa suơn sre dê. Tàm Nhai cau lơh phan nam do, Kông ty neh bơyai lơh uă broă lơh duh hồl, ngan ngồn nàng kờñ sền gròi rài kis cau lơh broă in: “Bơh tŭ mut lơh cau lơh kau su, geh bơta dong kờl mờ bơta pơlam bơh mpồl đơng lam bồ dê, bol hi lơh jat di broă rơndap lơh tàm broă lơh gơlik phan mờ cèng wơl priă jền lơh geh sùm. Tŭ do, rài kis bơh cau lơh kau su dê neh niam uă rlau, bơh priă sa, priă ngui tàm hìu bơnhă geh tơnguh. Muh mat ƀòn lơgar tŭ do neh tam gơl, đèng sòl àng geh wil tơl jơh. Tŭ do, gùng lòt kung geh tuh mờ ƀê tông, lă mờ cài. Lài do den kal ke ngan, hìu đam ờ niam, mơya tŭ do hìu đam dờng niam, rài kis neh tam gơl, krơi rlau mờ lài uă ngan”.

Geh git, tàm Nhai cau lơh phan nam do, ala mat cau lơh broă càr Gia Lai neh jàu priă dong kờl lơh pa, lơh niam wơl 25 nơm hìu ơm ala mat cau lơh broă ai cau lơh broă geh rài kis kal ke in.