Ròt jơnau cih “Tam gơl bơta yau gơgơs bơta pa tơrmù dipal mpồl lơh broă, ồs tơrlòng biàng, bòl glar klak ke tơrlòng kwang bàng” Jơnau cih 2: Ồs tơrlòng biàng bơh ală dơ̆ pờ gùng, blah bơnơm
Thứ sáu, 06:00, 30/05/2025 Cau mblàng Ndong Brawl/Cau cih VOV Tây Nguyên Cau mblàng Ndong Brawl/Cau cih VOV Tây Nguyên
VOV4.K'Ho- Bè neh đơs tàm jơnau cih dùl bơh ròt jơnau cih sền gŏ ngan ngồn “Tam gơl bơta yau gơgơs bơta pa tơrmù dipal mpồl lơh broă, ồs tơrlòng biàng- bòl glar kal ke tơrlòng kwang bàng”, ntrờn ù tiah lơh broă ngài gĭt nđờ rhiang kơi sồ mờ uă bơta gơ tam gơl bè rài kis, gam là ồs tơrlòng biàng, bòl glar kal ke tơrlòng kwang bàng gơ wèt mờ ală kông cưk, viên cưk tàm kơnhoàl ù tiah Tây Nguyên tàm dơ̆ tam gơl bơta yau gơs bơta pa tơrmù dipal mpồl lơh broă gam lơh sơrbac mhar ngan. Pal sền ngăc là gơ wèt mờ Tây Nguyên, ală bòl glar kal ke gam ndrờm bè ngan ngồn ngan, tài bơh uă kwang bàng gam lơh kơnòl broă kung neh geh tŭ sơrlèt ală bơta lòng do. Hơ̆ là ală kwang bàng kơnòm să rơhời lik lòt bơh càr Dăk Lăk tus ƀòn drà dềt Gia Nghĩa, kơnhoàl Dăk Nông 20 nam rê hờ lài.

Nùs nhơm tam klăc mờ bồ tơngoh jơh nùs jơh tồr bơh khi dê neh pơgồp bơnah bơ̆t bơtàu mpồl 6 kơnhoàl đah Jum càr Dăk Lăk yau dê, gơs càr Dăk Nông geh khà gơguh lơh sa, tŭ tơngai gơmù rƀah mhar ngan khà dùl khà bàr Tây Nguyên; bơ̆t bơtàu ƀòn drà dềt brê bơnơm lơm gơs tiah drà bơkàu rơmĭt Gia Nghĩa bềng bơta gơn kơnờm bơtàu tơngguh. Hơ̆ là ală pang sră cih jơnau kah yau ngan ngồn ngan, lơh gơlik bơta gơn kơnờm nàng nùs nhơm kwang bàng, bơta kơ̆ nùs cau đảng viên dê pơn jăt tai geh đòm jăt tàm dơ̆ tam gơl bơta yau gơs bơta pa tơrmù dipal mpồl lơh broă sră pơ àr gơnoar ătbồ gam geh lơh sơrbac mhar ngan. Bơnah bàr bơh ròt jơnau cih “Ồs tơrlòng biàng, bòl glar kal ke tơrlòng kwang bàng”:

Rơlao 20 nam lài, ngai 01 nhai 01 nam 2004, càr Dăk Nông mùl màl geh cơng gơs tŭ tam cah is bơh càr Dăk Lăk jăt Jơnau lơh nền tàm pơrjum Quốk hội dê. Jơnau kờñ tŭ hơ̆ là lơh pràn bơtàu tơnguh tiah Tây Nguyên, tơnguh cồng nha atbồ sră nggal mờ gàr niam dà lơgar, lơngăp lơngai. Mơta tàm bă ù “rơhài, jơrkai ờ ndrờm mờ càl Dăk Song”, rơƀah bè phan bơna, rài kis mpồl bơtiàn gam ờ pràn, ală cau sơnrờp ngan bơh mpồl lơh broă gơnoar atbồ neh tơmŭt tài bơh dùl rơnàng kwang bàng kơnòm să jơh nùs lơh broă.

Phan lơh broă bơh ală cau do dê là săk tềng ngkời ñhăp ñhar lơh ngan lòt lơh broă. Ờ geh hìu lơh broă, ală cau do ơpah hìu cau. Ờ geh ồs đèng, dà ngui sa, ală cau do jòi is. Ờ tơl mpồl kwang bàng lơh broă, ală cau do “lơh broă ndang mờ bơto ndang”. Tàm ală jơnau yal pơn dềt să bơh kwang bàng rài hơ̆ dê, là jơh dùl rài kal ke ờ tơl uă ngan, mơya ờ gơtùi ờ tơl nùs nhơm pin dờn: “Pah drim ngai dơ̆ bàr den tàm 4 jơ 30 phút là he lòt. Tus tàm do tàm 1 poh rê mờ kòn bao 1 dơ̆. Tus tàm do ơm bal, trồ mang sào bal, ơm kis bal. Hơ̆ sồng… oh mi kung tàm pơn dờm bal lơh gơs kơnòl”.

Bơh ală nam nhai glar bòl kal ke, tŭ do càr Dăk Nông neh geh uă tam gơl. Ƀòn dờng Gia Nghĩa ngai sơlơ niam bơnĕ, phan bơna geh lơh ndrờm bal rơlao, ală gah broă bè bơto bơtê, lơh sơnơm, niam chài, lòt nhơl ndrờm geh gơguh pràn kơl dang. Bơta do geh ồng Ngô Thanh Danh, Ƀí thư Tỉñ ủy càr Dăk Nông đơs nền: “Tơnơ̆ 20 nam crơng gơs wơl càr, Dăk Nông neh lik klàs bơta bơh dùl càr rơƀah ờ hềt bơtàu tơnguh mờ ală bơta tơngŏ pràn niam. Khà gơguh lơh sa sùm geh tàm khà uă, bơta pràn kờp jơh phan geh lơh uă rơlao 12 dơ̆, kờp jơh priă bơcri bơtàu tơnguh gùt mpồl bơtiàn gơguh uă rơlao 20 dơ̆, priă geh tơl nă cau gơguh rơlao 13 dơ̆ pơn drờm mờ nam 2004”.

Hơ̆ ờ mìng là ală khà kờp! Hơ̆ là cồng nha bơh dùl rơnàng kwang bàng neh “ơnòng tềng pơnì” bơh dùl tơngai bơceh lơh, bơh tŭ ờ geh tus geh. Tŭ do, gùng dà broă tơrgùm bal càr Dăk Nông mờ càr Lâm Đồng geh lơh, mpồl kwang bàng càr Dăk Nông mŭt tai tàm dùl broă lơh pa, uă jơnau kơ̆p gơn mờ kung geh uă bơta kơlôi rơcang sơl, tài do ờ di là broă tam gơl mpồl kwang bàng lơh broă mờ gam là dơ̆ ntrờn jơh rài kis. Lŏ Lê Thị Huệ, kwang bàng lơh broă tàm Mpồl rơndăp broă Tỉñ ủy càr Dăk Nông pà git: “Bol añ đơs chờ bal là tŭ do 1 rài 5 ƀòn. Bol añ kung pin dờn tàm gùng dà broă lơh bơh Đảng dê, kơ̆p kờñ kung geh ală bơta pa, niam tàm tiah lơh broă pa, mpồl lơh broă pa. Bol añ kung rơ̆p pơn jăt tai lơh ngan lơh broă”.

Lŏ Nguyễn Thị Quy, Lam bồ Cơl dŭ jơnau gơlik geh pah ngai, Anih Pờ tơlik jơnau đơs mờ Sơn-io rùp càr Dăk Nông pà git: “Tŭ hơ̆ he lòt mờ nùs nhơm cau gam kơnòm să, ờ geh kal ke gơkòl lơi bè hìu nhă. Dơ̆ do kung mờ nùs nhơm rơcang lài, mơya he pal geh broă rơndăp is să tờm. Bè hìu nhă he geh kòn gam dềt pal bơsram tàm tiah lơi, lơh broă lơi... ală bơta he pal lùp sền nàng git, kơlôi sơnơng mờ rơcang lài”.

Di lah 20 nam lài, ală kwang bàng bơh càr Dăk Lăk lik bơh ƀòn dờng Buôn Ma Thuột nàng tus ƀòn dờng Gia Nghĩa lơh broă mờ nùs nhơm lam lài bơh cau kơnòm să dê, den dơ̆ do, ală kwang bàng bơh ƀòn dờng Gia Nghĩa ntrờn tus ƀòn dờng Dà Làc mờ nùs nhơm kơ̆ dơn bơh cau neh geh rơcang lài dê. Mò Nguyễn Thị Thu Hường, Lam bồ phó Mpồl Rơndăp broă Tỉñ ủy càr Dăk Nông đơs tờm, bŭ lah kơlôi rơcang mơya kwang bàng càr Dăk Nông kung gam bè ờs bồ tơngoh kơlôi sơrlèt mờ kal ke bal mờ nùs nhơm lơh ngan lơh broă: “Rơlao 20 nam lơh broă bal mờ bơ̆t bơtàu càr Dăk Nông, bol añ ñhăp ñhar lòt gùng mờ geh ai tơngŏ bơh să tờm dê. Mờ dơ̆ do pơn jăt tai tơrgùm càr, bol añ rơ̆p pơn jăt tai tơnguh mờ nùs nhơm pràn kơl dang bơh kwang bàng đảng viên dê. Mờ lam sồr kwang bàng, đảng viên pơn jăt tai tơnguh uă nùs nhơm mờ tŭ lơi kung rơcang lài nàng lòt lơh broă”.

Broă tơrgùm bal càr Dăk Nông – Lâm Đồng – Bình Thuận ờ mìng là rơndăp tăp sèng wơl nhàr ù tiah. Mờ nùs nhơm kơlôi sơnơng jŏ jòng, do là dơ̆ niam nàng bơtàu tơnguh tiah lơh sa tờm đah Jum Tây Nguyên dê, do là tiah geh 3 tiah niam chài Dăk Nông – Lâm Đồng – Bình Thuận gơtùi tơrgùm bal, gơdờp bal mờ pơgồp bal uă. Ồng Lê Thành Hiệp, Kwang Lam bồ Anih tờm Niam chài Lơma càr Dăk Nông pin dờn mờ đơs: “Tŭ 3 càr geh tơrgùm bal gơs dùl càr Lâm Đồng, bơta geh là bơta tơnguh tiah lơh sa pa, tàm hơ̆ is ồn ngan bè bơta niam chài, jơi bơtiàn ờs mờng bơh 3 tiah dê rơ̆p geh ală broă nàng bơtàu tơnguh pơn jăt tai tìp bal, bơsram bal nàng git wă bal tai uă bơta niam chài krơi is bơh 3 tiah dê nàng bơtàu tơnguh bè niam chài, lòt nhơl nàng bơtàu tơnguh bal càr Lâm Đồng pa dê”.

Bàr jơ̆t nam lài, ală kwang bàng tàm càr Dăk Lăk ngài mờ hìu nhă, bơ̆t bơtàu càr pa Dăk Nông. Bàr jơ̆t nam tơnơ̆, ală kwang bàng do lòt gùng lik bơh càr Dăk Nông mờ neh geh uă broă lơh mờng chài bal mờ bồ tơngoh lơh ngan. Ală kwang bàng càr Dăk Nông tŭ do pơn jăt tai là ală cau lam lài, gàr sùm nùs nhơm pin dờn tàm bơta kwơ bơh ală dơ̆ tam gơl mờ Đảng, Dà lơgar bal mờ làng bol he neh mờ gam lơh; pin dờn tàm rài tơnơ̆ do mờ mìng geh nùs nhơm ai să mŭt lơh mờ sơrlèt mờ kal ke hơ̆ sồng gơtùi lơh gơs.

https://vov4.vov.vn/kho/jonau-tongit-mpol-botian-thoi-su-xa-hoi/rot-ala-jonau-cih-do-tormu-mpol-cau-loh-broa-sra-po-ar-gonoar-atbo-os-torlong-biang-kal-ke-torlong-kwang-bang-jonau-cih-1-ala-cau-boh-kap-ho-dom-bro-sa-guh-ho-dap-486785.vov4

Cau mblàng Ndong Brawl/Cau cih VOV Tây Nguyên

Viết bình luận

TIN CÙNG CHUYÊN MỤC