Do là dùl tàm ală broă lơh, broă lơh gờm chờ tơnggơs càr Lâm Đồng pa. Gùng rơndeh lòt mhar Bảo Lộc- Liang Khàng jòng mờr 74 kơi sồ, tàm tơrbŏ 2 ƀòn dờng Bảo Lộc mờ Dà Làc, lòt gan ală kơnhoàl: Bảo Lâm, Di Linh mờ Đức Trọng bơh càr Lâm Đồng. Do là gơl gùng rơndeh lòt mhar ù gờl tàm tơrbŏ bal mờ gùng rơndeh lòt mhar Tân Phú- Bảo Lộc mờ Dầu Giây – Tân Phú, tàm tơrbŏ bal ƀòn dờng Dà Làc, càr Lâm Đồng mờ ƀòn dờng Hồ Chí Minh mờ ală càr tiah đah Jum mat tơngai lik Dà lơgar, lơh geh bơta gơn kơnờm bơtàu tơnguh ai càr Lâm Đồng pa in.

Rơndăp broă lơh kờp jơh priă bơcri lơh (tơngai dơ̆ 1) rlau 17 rơbô 700 tơmàn đong, tàm hơ̆ geh rlau 7 rơbô 600 tơmàn đong bơh kes priă Dà lơgar, gam wơl priă bơh cau bơcri lơh dê hòi jà tă pơgồp bal. Ală cau bơcri priă Kông ty TNHH Bơcri priă mờ Bơtàu tơnguh gùng lòt rê T&T – Kông ty Bơcri priă bal Tập đoàn Phương Trang FUTA Group – Kông ty kổ phần Bơcri priă Bơt bơtàu gùng lòt rê Phương Thành gơ kờn là tờm cau mut lơh, mờ kờp priă gơ kờn là 11 rơbô 924 tơmàn đong, tơngai lơh sa - kă bro 19 nam 10 nhai. Jat broă rơndăp lơh, rơndăp broă lơh mut lơh tàm pơgăp 30 nhai.