Jăt jơnau yal bơh Sờh Niam chài, Tàp pràn să jan mờ Lòt nhơl càr Lâm Đồng dê, 6 nhai bồ nam do, càr Lâm Đồng hòi jà geh rơlao 12 tơlăk nă năc, geh 54% broă rơndăp lơh mờ gơguh 20% pơn drờm mờ tŭ do nam lài. Tàm khà do geh mờr 800 rơbô nă năc bơh ală lơgar, gơguh 56%. Broă tơrmŭt bal pe càr Lâm Đồng, Bình Thuận mờ Dăk Nông gơs càr Lâm Đồng pa neh pờ geh uă bơta dờng ơnàng ù tiah nàng lơh pràn gah lòt nhơl bơtàu tơnguh, gàr niam broă lơh gơs jơnau kờñ wă rơlao 22 tơlăk 400 rơbô nă cau năc tàm nam 2025. Mơya, broă rề ơnàng ù tiah kung lơh geh uă bơta gơkòl bè phan bơna gùng lòt, cau lơh broă jăk mờ bơta pràn sồ đah ală tiah dê…

Jăt ồng Nguyễn Văn Lộc, Kwang lam bồ Sờh Niam chài, Tàp pràn să jan mờ Lòt nhơl càr Lâm Đồng pà git, do là ală bơta gơkòl pal gờñ geh sền gròi mờ bơsong: “He rơhời wăc geh wơl rùp rài ù tiah lòt nhơl càr Lâm Đồng dê, mơya ờ di pal sơrbì jơh ală bơta kwơ lòt nhơl Dà Làc, Phan Thiết dê mờ là lơh pa. Lơh bè lơi nàng lơh geh tiah lòt nhơl tờm bơh Dà Làc, lòt nhơl Dăk Nông mờ tơrbŏ bal mờ lòt nhơl dà lềng, lơh geh mpồl pơgồp bal lòt nhơl bơh dà lềng brê bơnơm mù tàm tiah ring. Nàng bơtàu tơnguh geh lòt nhơl den pal tơrgùm bal lơh, tàm hơ̆ uă ngan là bè phan bơna. Bè Dà Làc – Phan Thiết, Dà Làc – Gia Nghĩa bơh tơnơ̆ tơnklàs tus tŭ do he kung gam lòt tàm ală gơl gùng neh klar lài do. Kơ̆p kờñ tus do càr rơ̆p bơcri priă lơh niam wơl ală gơl gùng do”.

Tơnơ̆ mờ tŭ tơrgùm bal gơs càr pa, Anih duh broă Làng bol càr Lâm Đồng sồr Sờh Niam chài, Tàp pràn să jan mờ Lòt nhơl pơgồp bal mờ Sờh Jăk chài, Măi mok pa kơlôi sơnơng mờ lơh geh ală gùng dà broă lơh geh kwơ nàng drơng niam broă kờñ bơh cau năc dê, lơh pràn geh lòt nhơl bơtàu tơnguh. Jăt jơnau dan bơh Sờh Jak chài mờ Măi mok pa càr Lâm Đồng dê, tềng đăp măt, càr rơ̆p tơrgùm bal ală anih điện tử lòt nhơl ngăc ngar bơh pe càr lài do gơs dùl anih điện tử lòt nhơl càr pa dê. Mờ, tơrgùm bal ală phan lòt nhơl tàm điện thoại ngăc ngar bơh bàr càr Lâm Đồng mờ Bình Thuận lài do, lơh gơs dùl app ngui bal geh broă bơtơl ală jơnau tơngit, bơta kwơ bè lòt nhơl bơh càr Dăk Nông dê tai.

Nàng lơh geh bơta pràn, tơnguh uă bơta niam ai cau năc lòt nhơl in, phan lơh broă do gam gơtùi tơrgùm bal mờ AI, pơgồp bal bơta ngăc ngar kòn bơnus lơh gơs tàm mpồl lơh broă. Ồng Võ Thành Công, Kwang Lam bồ Sờh Jăk chài mờ Măi mok pa càr Lâm Đồng pà git: “Cau năc bơh ƀòn dờng Hồ Chí Minh kờñ lòt nhơl cau tàm hìu nhă 4 nă tàm 3 ngai, ală cau do kờñ cih ha là đơs tàm app he dê bè jơnau kờñ bè hơ̆. App rơ̆p hơ wơl mờ geh bal ală jơnau pơlam: dùl ngai lòt tus tàm tiah lơi, anih lơi, tiah lơi, ngui rơndeh lơi mờ lơh ală broă lơi… di lah lơh geh bè hơ̆, cau năc lòt nhơl rơ̆p niam mờ lơh jăt ală broă lòt nhơl bơh să tờm dê tàm ù tiah càr”.

Ồng Hồ Văn Mười, Củ tịc Anih duh broă Làng bol càr Lâm Đồng đơs là càr geh khà ù tiah dờng ơnàng nàng bơtàu tơnguh bè niam chài, tàp pràn să jan mờ lòt nhơl. Tàm hơ̆ Dà Làc gam sơnđan là “Lâm Đồng rơbô bơkào”, Bình Thuận sơnđan là “Lâm Đồng dà lềng tơlir”, Dăk Nông sơnđan là “Lâm Đồng brê bơnơm dờng”. Jơh ală bơta pràn, bơta geh dờng màng do pal geh broă pơgồp bal, ring bal mờ ndrờm bal den hơ̆ sồng gah lòt nhơl càr dê hơ̆ sồng bơtàu tơnguh pràn kơl dang mờ kơl jăp: “Đơs ngan Lâm Đồng geh bơta pràn bè niam chài, tàp pràn să jan mờ lòt nhơl dờng ngan. Bơta tờm là tŭ do tơnguh bơta pràn dờng màng do bè lơi hơ̆ sồng là kwơ màng. Bồ tơngoh kơlôi sơnơng càr bi, càr añ, càr ndai pơgồp bal wơl pe là ờ di. Pe càr bè pe nơm jơng jơgàng, pràn kơl dang, mơya jơgàng do ờ hềt ndrờm. Tŭ do tiah dà lềng tơlir mờ rơbô bơkào den neh iang nùs bloh, mơya tiah Dăk Nông tài broă lơh gam ờ pràn den tàng pal geh tơnguh nàng ndrờm bal”.