Do là ală rơndăp broă lơh gơwèt ală gah gùng lòt, gah lơh sơnơm, bơto bơtê, kông viên-tiah tềl lời wơl mờ ală broă lơh bơt bơtàu mpồl bơtiàn kwơ màng. Ală broă lơh bơt bơtàu geh sơnđờm mut lơh mờ ai mut ngui ờ mìng tơnguh uă bơta niam rài kis ai làng bol in lơm mờ gam pơgồp bơnah lơh sir phan bơna bơt bơtàu măi mok, lơh geh bơta gơ hòi gơ jà bơcri priă mờ bơtàu tơnguh kơ̆ kơl jăp ai ală tiah tàm ală nam tus in.

Dơ̆ bơyai lơh tờm geh bơyai lơh tàm Anih tờm Drà Ràng tơlik Dà lơgar (sàh Đông Anh, Hà Nội), mơkung tàm tơrbŏ tơn mờ 79 tiah pờ tơlik tơn tàm gah sơñio rùp tàm uă rơndăp broă lơh, broă lơh bơt bơtàu tàm làm gùt lơgar. Dơ̆ bơyai lơh mblàng yal jơnau yal bè jơh nùs lơh ngan, geh kơnòl mờ nùs nhơm ring bal bơh jơh ală anih lơh broă cíñ trị tàm broă lơh jat ngan ngồn jơnau kờñ bơtàu tơnguh, lơh gơ rề uă bơta pơn yờ să, nùs nhơm tam klăc bal mờ jơh nùs lơh ngan bơt bơtàu dùl lơgar Việt Nam ngai sơlơ pas gơs.

Tàm dơ̆ sơnđơm ai mut ngui Anih tờm Drà Ràng tơlik Dà lơgar, Tổng Ƀí thư ồng Tô Lâm mờ Thủ tướng Cíñ phu ồng Phạm Minh Chính neh jàu Gai Lòng Lơh broă khà 1, khà 3 ai ală mpồl cau bal neh geh uă tă pơgồp is ồn tàm bơta bơtàu tơnguh lơh sa - mpồl bơtiàn bơh càr lơgar mờ Dà lơgar dê. Tàm tiah Tây Nguyên - tiah đah Jum tàm gùl lơgar di dơ̆ do geh 14 broă lơh geh sơnđờm mut lơh mờ sơnđờm ai mut ngui, tàm hơ̆ càr Gia Lai geh 3 broă lơh, Dăk Lăk 3 broă lơh, Khánh Hoà 4 broă lơh, Lâm Đồng 4 broă lơh.