Dờp jơnau jà bơh Củ tịc lơgar ồng Lương Cường mờ Pơ ùr dê, Bơtau lơgar Bhutan ồng Jigme Khesar Namgyel Wangchuck mờ Pơ ùr neh tus Hà Nội sơn đờm lòt còp kâp dà lơgar tus lơgar Việt Nam bơh ngai 18 tus ngai 22/8. Do là dơ̆ lòt còp kâp dà lơgar sơn rờp tus lơgar Việt Nam bơh Bơtau lơgar Bhutan mờ Pơ ùr dê kờp bơh tŭ 2 lơgar crơng gơs bơta git gơp cribơyai broă mờ lơgar ndai tàm nam 2012. Kờp bơh tŭ crơng gơs bơta git gơp cribơyai broă mờ lơgar ndai, Việt Nam sùm sền dờng màng bơta git gơp mờ Bhutan, sền Bhutan là dùl tàm ală lơgar lam lài tàm broă lơh jat jơnau kờñ gơguh lơh sa tơlir, gàr kơ̆ ală khà sồ sơñio “gơboh gơbài”. Tàm tŭ hơ̆, Bhutan sùm sền Việt Nam là dùl tàm ală lơgar lài ngan nàng chồl tơnguh bơta git gơp 2 gah kung bè kơp kờñ bơsram mờng chài bơtàu tơnguh bơh Việt Nam dê.

Tàm bơnàng jă bơta git gơp lơh bơyô niam bơnĕ, dơ̆ lòt còp bơh bơtau lơgar Bhutan dê ai tơnggŏ bơta ki ngàm bơh Bhutan dê gơ wèt mờ bơta git gơp lơh bơyô mờ lơh broă bal đah 2 lơgar, kung bè gơnoar broă bơh lơgar Việt Nam dê tàm tiah do, mờ kung ai tơnggŏ bơta ki ngàm bơh Việt Nam dê gơ wèt mờ Bhutan. Dơ̆ lòt còp nàng kờñ ai bơta git gơp 2 lơgar bơtàu tơnguh tàm jơh ală bơta, geh cồng nha, chồl tơnguh ală broă geh bơta pràn đah 2 lơgar tàm tơngai tus.