Pơrjum đơs, uă rơndap broă lơh neh geh tŭ gơtìp ơm ing tài jơnau ờ gơtùi git lài mờ tài sền ờ sơp. Tơngai lài, Ƀộ Cíñ trị, Mpồl đơng lam Đảng mờ Tổng Ƀí thư ồng Tô Lâm neh sồr nền nòn ngan nàng kờñ ai priă jền, pleh pơhì pơhà phan bơna dà lơgar, mpồl lơh sa kă bro mờ làng bol. Đơs pơn dut pơrjum, Thủ tướng ồng Phạm Minh Chính cih dờp ală jơnau đơs tă pơgồp song dơpă, di mờ bơta geh ngan.

Thủ tướng sồr ală ƀộ, gah broă lơh, ală tiah kờp sền, sac rơ wah mờ geh jơnau sồr bè broă lơh bơsong jat gơnăp gơnoar. Ală tơngume sơrlèt rlau gơnăp gơnoar pal di tŭ yal kâp hơđang in. Broă bơsong pal gàr di cau, di broă, di mờ jơnau sồr bơh Đảng dê mờ jơnau cih bơh adat boh lam dà lơgar dê, pơgồp bơnah ai ală rơndap broă lơh gờñ lơh broă, lơh geh bơtàu tơnguh lơh sa – mpồl bơtiàn.