Tơnơ̆ 1 nhai lơh broă gơnoar atbồ 2 kâp, càr Lâm Đồng ơm dơ̆ 4 gùt lơgar bè khà sồ sơñio bơta niam nùs broă drơng ala dà lơgar. Bulah bè hơ̆, tŭ lơh broă mpồl lơh broă sră pơ àr gơnoar atbồ kung ai tơnggŏ bàr pe bơta kal ke, gơ kòl tàm kâp sàh.

Gùt càr geh 93 sàh, sơnah ƀòn ờ tơl cau lơh broă geh bơta mờng chài jrô nàng bơsong broă; 60 sàh, sơnah ƀòn ờ tơl cau lơh broă tàm gah phan kuơ geh is mờ itah ơm kis; 33 sàh, sơnah ƀòn ờ tơl cau lơh broă tàm gah atbồ bơt bơtàu. Bơh ngai 01/8, Anih duh broă Làng bol càr Lâm Đồng neh ai cau lơh broă sa priă nhai dà lơgar rê ală sàh nàng dong kờl broă lơh bơh mpồl lơh broă sră pơ àr gơnoar atbồ dê. Tàm dơ̆ do geh 260 nă cau lơh broă sa priă nhai dà lơgar geh ai rê hờ kâp sàh. Bal mờ hơ̆, Kwang àng càr Lâm Đồng sồr 370 nă kwang bàng, cau ling kwang àng mờ cau ling sồr 100 nă ling grăp ƀòn rê hờ sàh. Kờp dŭ ală cau lơh broă sa priă nhai dà lơgar rơp geh ai rê sàh nàng lơh kơnòl broă tàm tơngai 3 nhai, ờ mìng tus bal tơn tàm broă geh sồr lơh mờ gam pơlam, bơto bơtê ai kwang bàng kâp sàh in tai.