Liên đoàn Arab là mpồl bơh ală lơgar Arab tàm tiah câu Phi mờ bồt Arab dê, geh crơng gơs bơh nam 1945. Tŭ do, Liên đoàn Arab geh 22 lơgar geh jơng. Nhai 7 nam 2023, Việt Nam mờ Liên đoàn Arab neh crơng gơs mpồl lơh broă bal. 

Đơs tàm do, Củ tịc lơgar ồng Lương Cường đơs sùm: Việt Nam kơp kờñ cih gơs dùl tap pa tàm bơta git gơp lơh broă bal uă gah đah Việt Nam mờ ală lơgar Arab oh mi tài ring lơngai, lơh broă bal mờ bơtàu tơnguh. Yal wơl ală cồng nha dờng màng geh gơtha kah yau bơh lơgar Việt Nam dê tàm mờr 40 nam tam gơl pa, Củ tịc lơgar kung yal 5 jơnau bơsram mờng chài dờng. Tŭ do, Đảng, Dà lơgar Việt Nam neh geh broă rơndap lơh pa, pơn đơl pràn tus nam 2045 ai Việt Nam gơ gơs là lơgar bơtàu tơnguh, priă lơh geh uă. Củ tịc lơgar đơs nền, Việt Nam sùm sền dờng màng, sền gàr mờ pơn yờ să ngan tŭ geh bơta git gơp cribơyai broă mờ lơgar ndai mờ jơh 22 lơgar geh jơng bơh Liên đoàn Arab dê, mờ uă gah lơh broă bal ngai sơlơ ngan ngồn mờ geh cồng nha. Củ tịc lơgar kung sồr 2 gah sơlơ tơnguh tai pơgồp bal tàm ală anih cribơyai uă lơgar tàm tiah do mờ dunia, bal mờ gơp lơh geh ring lơngai kơ̆ kơljap jŏ jòng sùm tàm jơh bal 2 tiah, pơgồp bơnah bơt bơtàu dùl dunia niam bơnĕ rlau, niam chài kòn bơnus rlau, pal kis rlau.