Mang òr (04/08), tàm Hìu lơh broă Cíñ phủ, Thủ tướng Cíñ phủ ồng Phạm Minh Chính đơng lam pơrjum dơ̆ Sơnrờp Mpồl sồr lơh Dà lơgar lơh jăt Jơnau lơh nền tàm pơrjum sồ 68 bơh Ƀộ Cíñ trị dê bè bơtàu tơnguh lơh sa cau dùl nă să lơh. Tơnơ̆ mờ 3 nhai geh ai ngui Jơnau lơh nền tàm pơrjum sồ 68, gơdờp loh làng ngan là broă tam gơl niam, tam gơl tàm bồ tơngoh kơlôi sơnơng jơnau git wă bơh gùt mpồl bơtiàn dê, bơh dà lơgar tus tàm ală sàh, mpồl lơh broă, mpồl tam klăc bal lơh broă, làng bol, mpồl bơtiàn mpồl lơh sa kă bro, hìu kă bro. Mpồl mŭt lơh broă gơguh pràn kơl dang.

Nhai 6 nam 2025, dờp geh khà gơguh uă ngan bơh lài tus tŭ do mpồl lơh sa kă bro crơng gơs pa tus 24 rơbô mpồl lơh sa kă bro. Nhai 7 gùt lơgar geh rơlao 61 rơbô hìu kă bro geh crơng gơs pa, gơguh uă rơlao 2 dơ̆ pơn drờm mờ tŭ do nam lài. Tàm pơrjum, Thủ tướng ồng Phạm Minh Chính đơs tờm, lơh jăt nền nòn ală jơnau kờñ neh geh ai tàm ală Jơnau lơh nền tàm pơrjum bơh Ƀộ Cíñ trị, Quốk hội, Cíñ phủ mờ jơnau kờñ bơh mpồl lơh sa kă bro dê, hơ̆ là ai mpồl lơh sa kă bro cau dùl nă să gơs bơta pràn kwơ màng ngan tàm broă bơtàu tơnguh lơh sa dà lơgar dê. Thủ tướng sồr pal pơn jăt tai lơh pràn broă bơsong ală gơkòl nàng mpồl lơh sa kă bro geh tus bal mờ phan geh is, phan kwơ geh is, bơto cau lơh broă, bơta chài măi mok pa, tam gơl sồ… Pơn jăt tai lơh jăt gùng dà koh tơrmù sră nggal, lơh pràn broă tam pà kấp, tàm pà gơnoar atbồ ai ală tiah in. Thủ tướng kung sồr ală tiah bơtơl, lơh gơs broă rơndăp lơh rơndăp broă pa, mờ tơrgùm bơ̆t bơtàu mpồl lơh broă dong kờl mpồl lơh sa kă bro di mơ mờ dềt bè phan bơna bè ồs đèng, ơpah ù, priă, priă pal tă. Tơnguh broă cri bơyai, iăt ală jơnau nàng bơ̆t bơtàu gùng dà broă lơh, broă dong kờl làng bol, mpồl lơh sa kă bro, hìu kă bro.