Tàm dar pơrjum bal bơh Pơrjum kwang bàng kâp dờng bè dà lềng dờng bơh Liên hợp quôk dê dơ̆ 3 geh bơyai lơh tàm lơgar Tây, Thủ tướng Cíñ phủ ồng Phạm Minh Chính neh geh jơnau đơs kuơmàng ala mat ai 10 lơgar Mpồl ală lơgar đah jum mat tơngai lik câu Á (ASEAN) in, mờ kung tam pà bơta kơlôi sơnơng bơh lơgar Việt Nam dê bè prap gàr mờ ngui kơ̆ kơljap sùm dà lềng, dà lềng dờng mờ phan kuơ tàm dà lềng. Thủ tướng Cíñ phủ hòi jà mpồl bơtiàn ală lơgar pal lơh broă mhar rlau, pràn rlau, kràñ cê rlau tai mờ pal geh bơta pơgồp bal bơh ală lơgar, ală tiah mờ jơh gùt dunia dê tàm broă prap gàr mờ ngui kơ̆ kơljap sùm dà lềng dờng tơlir.

Thủ tướng ai tơlik 4 broă lam lơh lài, geh; gàr sùm ring lơngai, lơh broă bal tàm dà lềng; sồr atbồ dà lềng kơ̆ kơljap jŏ jòng sùm; sền dà lềng dờng là bơta gơn kơnờm bơtàu tơnguh mờ sơlơ tơnguh tai lơh broă bal gùt plai ù ai jơnau kờñ bơtàu tơnguh kơ̆ kơljap jŏ jòng sùm in. Ồng kung đơs nền bơta kuơmàng bơh Kông ươk Liên hợp quôk dê bè Adat dà lềng nam 1982 bè jơnau pal jat broă lơh sền gàr dà lềng dờng. Thủ tướng ai tơlik ală gùng dà broă lơh lài: pơgồp bal kơlôi sơnơng mờ bơta geh ngan ờs mờng, ngui măi mok mờ tam gơl sồ, lơh geh uă ngan rlau jơh priă jền bơh lơh sa dà lềng, pơgồp bal uă gah, tàm tơrbŏ bal ală lơgar mờ sơlơ tơnguh tai lơh broă bal ală lơgar. Việt Nam hơ pơrgon lơh broă pràn kơldang, tơl làm nàng lam lơh jat jơnau kờñ, mờ nùs nhơm 3 rơcang lài, lam lơh broă lơh bơtàu tơnguh lơh sa dà lềng tơlir, sơlơ tơnguh tai lơh broă bal gùt plai ù mờ lam lài tàm ală jơnau bơceh lơh prap gàr dà lềng.