Tàm dar cribơyai tàm mpồl bơh pơrjum dơ̆ 9, Quôk hội khoă XV dê, Thủ tướng Cíñ phủ ồng Phạm Minh Chính đơs nền: Tàm tŭ tơngai uă bơta lòng gùt plai ù, Việt Nam tơlik jơnau kờñ gơguh lơh sa geh rlau 8% nam 2025 mờ wèt tus gơguh lơh sa 2 nơm sồ tàm tơnơ̆ do, pơnđơl pràn, lơh ngan gơ gơs là lơgar bơtàu tơnguh, priă lơh geh uă tàm nam 2045. Nàng lam lơh ngan ngồn jơnau kờñ hơ̆, Thủ tướng đơs là, pal tơrgùm tàm 3 bơta tam gơl pràn kuơmàng, hơ̆ là gùng dà broă lơh, phan bơna mờ cau lơh broă. Tàm hơ̆, tam gơl pràn bè gùng dà broă lơh là bơta gơ kòl bơh ală bơta gơ kòl dê, mơya kung là priă jền, bơta gơn kơnờm ai bơtàu tơnguh in. Thủ tướng đơs nền broă lơh jat Jơnau lơh nền tàm pơrjum sồ 66, lơh ngan tă bơsong ală kòl yan gùng dà broă lơh tàm nam 2025 nàng kờñ lơh gùng dà broă lơh gơ gơs bơta pràn tàm pơrlòng. Thủ tướng hòi jà Quôk hội pơn jat tai tò dong pràn kơldang broă lơh tam gơl gùng dà broă lơh, lơh gơlik bơnàng jă kơ̆ kơljap nàng dà lơgar bơtàu tơnguh mhar, kơ̆ kơljap tàm tơngai tus.