Tàm tơngu me jơnau yal mờ jơnau cri bơyai bơh ală kwang bàng geh jơng tàm Mpồl duh broă Đảng dà lơgar, jơnau đơs pơn dŭt dơ̆ pơrjum, Tổng Ƀí thư ồng Tô Lâm đơs nền, sồr lơh pràn broă ngui sồ ngui bơta chài măi mok pa tàm broă ai pơgồp jơnau đơs bơh làng bol, bơh ală anih lơh broă geh gơnoar geh ai kung pal lơh niam broă tơrgùm bal, gàr bơta niam tàm broă cih jơnau, tơngu me jơnau đơs pơgồp bơh làng bol, jơnau yal Quốk hội sền wơl mờ ai tơlik jơnau dŭt ndơl.

Gơrềng tus mờ uă broă bè lơh jăt Jơnau lơh nền tàm pơrjum sồ 18 bơh Dà lơgar dê bè broă pơn jăt tai tam gơl pa, rơndăp tăp sèng mpồl lơh broă cíñ trị tơrmù di pal, lơh broă pràn, geh cồng nha, Tổng Ƀí thư sồr, Cíñ phủ mờ ală ƀộ, gah lơh broă gơrềng bal tơrgùm tam pà kấp, tam pà gơnoar nền nìn tàm broă lơh jăt là tơrgùm lơh pràn mhar, pal tam gơl tờm bè bồ tơngoh nàng ală tiah lơh jăt nàng jơh ală mpồl lơh broă bơh Dà lơgar tus ală sàh lơh di mờ gơnoar, kơnòl broă geh jào.