Ngai 16/5, tàm Hìu lơh broă Củ tịc, Thủ tướng Cíñ phủ ồng Phạm Minh Chính neh đơng lam dơ̆ wă rò ngan ngồn Thủ tướng Thái Lan mò Paetongtarn Shinawatra. Tơnơ̆ dơ̆ wă rò, 2 Thủ tướng đơng lam bal pơrjum dơ̆ 4, Cíñ phủ bal Việt Nam mờ Thái Lan. Tàm pơrjum, bàr Thủ tướng ring bal tơnguh bơta git gơp Thái Lan – Việt Nam gơ gơs lơgar lơh broă bal jŏ jòng tơl làm. Sền wơl bơta git gơp 2 lơgar tơnơ̆ 10 nam lơh bơta git gơp lơh broă bal jŏ jòng, Thủ tướng pà git 2 lơgar geh ală bơta niam pơn rơ ngan; Hơ̆ là bơta pin dờn cíñ trị kuơmàng ngai sơlơ geh tơnguh, tàm pơ gơl mpồl geh chồl pràn tàm jơh ală broă, ală kâp. Lơh broă bal sền gàr dà lơgar, sền gàr lơngăp lơngai ngai sơlơ geh cồng nha, gơ gơs là gah tờm ngan bơh 2 lơgar dê. Lơh broă bal lơh sa, kă bro, bơcri priă gơguh pràn jơh bal bè bơta niam.

Bơh nam 2016 tus tŭ do, Thái Lan là lơgar lơh broă bal kă bro dờng ngan rlau jơh bơh Việt Nam dê mờ Việt Nam là lơgar lơh broă bal dờng dơ̆ 2 bơh Thái Lan dê tàm ASEAN, mờ priă lơh geh bơh kă bro đah 2 lơgar nam 2024 geh rlau 20 tơmàn dolar Mỹ mờ wèt tus lơh geh 25 tơmàn dolar Mỹ tàm ală nam tus do. Tơnơ̆ pơrjum dơ̆ 4, Cíñ phủ bal Việt Nam – Thái Lan, Thủ tướng ồng Phạm Minh Chính mờ Thủ tướng Thái Lan mò Paetongtarn Shinawatra neh sền dơ̆ tàm pơ gơl sră nggal lơh broă bal đah ală Ƀộ, gah broă lơh bàr lơgar.