Jat jơnau yal, tàm nam 2023, Dăk Lăk ờ geh cau bơtờp kòp rang, mơya tus nggùl nam tơnơ̆ 2024, kòp rang neh gơguh nisơna tus mờr 900 nă cau, bal mờ 31 nă cau kòp rubella. 3 nhai bồ nam 2025, khà cau bơtờp kòp rang pơn jat tai ơm tàm khà uă mờ 206 nă cau, gơguh 100% pơndrờm dùl tŭ bal mờ nam 2024, tơrgùm tàm ală kơnhoàl Buôn Đôn, Krông Păc, Mdrăk mờ Ea Súp. 30% nă cau bơtờp kòp rang tàm càr Dăk Lăk gơwèt mpồl kơnòm să bơh 1 tus 4 sơnam, uă ngan là kơnòm ờ hềt geh gĭt vaccine rcang lài kòp.

Nam lài, khà cĭt vaccine rcang lài kơryan kòp rang tàm càr Dăk Lăk lơh geh 95%, mơya 2 nhai bồ nam do khà do mìng lơh geh 15%. Ồng Võ Hải Sơn, Phó Kwang atbồ Kụk Rcang kòp pà gĭt, rơ̆p ngui tơl bơta pràn nàng ai vaccine ai càr Dăk Lăk in, gàr niam lơh geh khà geh cĭt jơh vaccine ai kơnòm dềt in.