Ngai 08/10, nùs nhơm rơcang ai Ngai chờ Niam chài kòn cau Mông dơ̆ 4 nam 2026 in geh bơyai lơh jal mhar ngan tàm càr Điện Biên. Ală mpồl cau chài, cau pơrlòng tus bơh 11 càr gam tơrgùm pơlam tàp, lơh sir ală jơnau bơyai lơh đơs crih tamya, mờ kung rơcang ală anih ràng phan, phan tiơng pơn rơ krơi is, crăp rơcang yal tơnggit ală bơta kuơ niam chài mờ phan bơkah làng bol kòn cau Mông dê tus làng bol, nac lòt nhơl. Ngai chờ Niam chài kòn cau Mông dơ̆ 4 geh bơyai lơh bơh ngai 09 tus ngai 11/10, mờ mờr 800 nă cau chài, cau pơrlòng tus bơh 11 càr, geh: Điện Biên, Tuyên Quang, Phú Thọ, Thái Nguyên, Sơn La, Cao Bằng, Lai Châu, Lào Cai, Thanh Hóa, Nghệ An mờ Dăk Lăk. Is ồn, Điện Biên geh 101 nă cau chài, cau tàm mpồl tus bal ală tơngume niam chài mờ 62 nă cau pơrlòng tus bal 6 môn tàm pơrlòng mờ 35 tơngume.

Ală ƀòn lơgar cèng tus ală phan pơgồp bal mờ rài kis mờ bơta niam chài kòn cau Mông ală tiah dê, bơh phan soh, ồi kòn cau, phan mòn mờ tê ờs mờng tus phan lơh gơs bơh suơn sre, phan bơkah tiơng pơn rơ mờ ală phan drơng rài kis in. Do ờ mìng là anih nàng yal tơnggit phan lơh gơs, mờ gam dong làng bol đal git loh rlau tai jơnau niam chài tơnơ̆ tơl bơta phan lơh gơs.