Mang tus, tềng đap blàng jơng hìu rông bơhiàn yau ƀòn Kte, sàh Phú Thiện, càr Gia Lai, uă ngan làng bol bơh ală ƀòn tơrgùm wơl tus bal broă lơh dròng cing jañ mồng mờ tơngume “Sền gàr bơhiàn niam chài- lơh gơ rề uă bơta kwơ niam chài”. Tàm gơnru ồs hơng, săp ntas dròng cing jañ mồng mpông dờng, bơnĕ bơnài bal mờ gùng tam ya xoang lơbơn niam, lơh geh dùl ù tiah niam chài Tây Nguyên bềng bơhiàn niam chài is, tiah ală bơta kwơ bơhiàn ờs mờng bơh kòn cau Jrai dê geh sền gàr mờ tàm pơrdờn. Tàm dar tam ya xoang hô hơng, ồng Siu Yar, làng bol ƀòn Kte, bulah neh dờng sơnam, yô mpàng tê kung gam pràn ngan sơl, rơlĕ rơlùn dròng tơl săp ntas cing dê, sồr ngan tơl nă cau tàm sơm bat tê bal lơh geh dar tam ya xoang kòn cau Jrai dê.

“Sàh bơyai lơh bơto wơl bơhiàn ờs mờng jơi bơtiàn he dê, niam chài dròng cing jañ mồng, bol añ gŏ pơn yờ să ngan, chờ hờp ngan. Tài bơh bol añ kờñ ngan cing yau, cing bơh cau kra lài do dê niam ngan, iăt stăp ntas cing nùs nhơm hô hơng ngoh rơngăc. Ưn ngài Mpồl bơyai lơh, kwang bàng tàm sàh neh bơyai lơh ai bol añ in geh dròng cing mờ rơ̆p pơn đơl pràn lơh ngan bơto wơl tàm dơ̆ pơlam tàp do ngan ngồn geh cồng nha”.

Is ồn, tàm broă lơh, 40 nă cau bơsram kòn cau Jrai tàm sàh Phú Thiện pa jơh bơsram ơdŭ bơto pơlam dròng cing jañ mồng, bơh cau chài jak ồng Nay Phai tus bơh sàh Phú Túc dê tơn bơto; neh pin dờn ràng tơlik 3 jơnau dròng cing ờs mờng: "Kờñ tàñ ngan tàñ ồi yau", "Hìu ờ gơtùi hŭi" mờ "Jơnau jờng rơ kồñ Thoach". Bi K'Sor Triệu - pơnu ơm tàm ƀòn Phú Thiện chờ hờp yal nùs nhơm "bơsram lòt bal mờ lơh jat bal", nàng gơ gơs là cau tờm bơh broă lơh niam chài - đơs crih tam ya dê.

"Añ tus tàm do bơsram wơl dròng cing bal mờ ală cau chờ hờp ngan, tài bơh geh jòi sền, sền gàr wơl niam chài kòn cau he dê. Rlau mờ hơ̆ bol he là ơruh pơnu, ală cau tờm kờñ pal lơh jat, lam lài tàm srơh bơyai lơh bơto wơl, yal tơngĭt niam chài dròng cing jañ mồng ai rơnàng tơnơ̆ do tàm xã Phú Thiện in".

Neh rlau 70 sơnam, mơya mờ nùs nhơm jơh nùs kờñ sền gàr niam chài dròng cing mồng mồng Tây Nguyên, Cau chài jak ồng Nay Phai neh lòt rlau 80 kơi sồ bơh sàh Phú Túc tus ƀòn Kte, sàh Phú Thiện nàng bơto wơl bơta chài dròng cing jañ mồng ai làng bol in. Ồng chờ hờp ngan tài bơh ală cau bơsram ndrờm jơh nùs tàp mờ neh dròng geh ală jơnau cing ờs mờng kòn cau Jrai dê.

"Pah dơ̆ lòt bơto wơl, lòt lơh niam wơl cing, añ gơlơh gĭt loh ngan bơta tàm tơrbŏ bal, kờñ gơboh mờ rềp mềr bơh làng bol tàm ƀòn lơgar dê. Ală broă lơh pơrjum mpồl bơtiàn geh săp ntas cing mồng dê sùm lơh gơlik bơta tàm tơrbŏ bal, tam klăc bal đah tơl nă cau, ờ lời gơlik geh bơta tam cah is. Is ồn, pah dơ̆ bơto wơl ală sau in, añ gŏ ală sau kờñ ngan mờ cing mồng. Sền ală sau gơlơh chờ hờp bè hơ̆, añ gơlơh chờ hờp ngan mờ hơ̆ kung là bơta lơh añ in sơlơ geh tai bơta pràn nàng pơn jăt tai bơto wơl."

Poan mang lồi poh tàm sàh Phú Thiện, càr Gia Lai geh bơyai lơh broă lơh dròng cing jañ mồng mờ yal tơngĭt phan sa ờs mờng bơh yau kòn cau Tây Nguyên dê tàm ală ƀòn Kte, Rbai, Amil mờ Phú Thiện. Ồng Nguyễn Văn Hưng - Phó Kwang atbồ Anih tờm drơng broă lơh dà lơgar sàh Phú Thiện pà git, broă lơh do ờ mìng nàng rơwah ală cau chài jak ngan nàng tus bal Festival dròng cing jañ mồng càr Gia Lai mờr tus dê lơm, mờ gam pơgồp bơnah prap gàr, ngui niam ù tiah niam chài cing mồng Tây Nguyên dê.

"Mờ bơta kơ̆p kờñ prăp gàr phan lời wơl niam chài neh geh UNESCO dờp, hơ̆ ờ mìng là niam chài bơh làng bol Tây Nguyên dê lơm mờ gam là phan lời wơl bơh jơi bơtiàn kòn bơnus dê. Bol añ kơ̆p kờñ ală nam pơn jăt tai, Dà lơgar dong kờl priă jền nàng bol añ in pờ uă ơdŭ bơto bơtê, dong ală cau chài geh bơta chài niam rơlao, gơ hòi gơ jà cau kơnòm să tus bal broă lơh prăp gàr niam chài bơh jơi bơtiàn he dê".

Sap ntas cing mồng gam mpong dờng, dar tam ya xoang kung gam tàm tơrbŏ jòng kềng gah gơn ru ồs hơng hìu rông tàm sàh Phú Thiện, càr Gia Lai dê. Cau kra bơto wơl, rơnàng kơnòm să dềt pơr dờn lòt jat bal, ală gùng cing ờ mìng sền gàr nùs nhơm niam chài is jơi bơtiàn dê lơm mờ gam tàm tơrbŏ bal mpồl bơtiàn, lơh geh rùp să rài kis Tây Nguyên dê bềng bơhiàn niam chài is mờ bềng bơta pràn kis.