Cau chài jak ngan ồng A Bang, kòn cau Sơdàng ơm tàm thôn Đăk Tô 3, sàh Đăk Tô, càr Quảng Ngãi. Tŭ gam dềt, ồng sùm lòt jat bèp, bi klau mờ cau dờng tàm ƀòn mut tàm brê nàng jòi sơkàr mòn đờng. Kung bơh ală dơ̆ lòt hơ̆, ồng neh git rơ wah phan nàng mòn đờng goòng mờ bơta chài mòn bal mờ bơta chài đal git, iat kơno mờ sền swì bơta niam sap ntas dê:

“Añ ờ geh bơsram gùng đơs crih tàm ơdŭ bơsram, hìu bơsram lơi. Bơh tŭ gam dềt añ neh kờñ sap ntas đờng, sap cing den tàng lòt jat bèp, jat bi klau nàng bơsram. Bèp mờ bi klau bơto añ in kung krơi sơ ƀơi ngan sơl, sùm ià ding sơkàr ơn rềp tồr, hơ̆ sồng teh rơlĕ, sồr añ iat nền, pal kah sap ntas hơ̆. Tơnơ̆ do, ală sap ntas gam kah tàm bồ tơngoh, añ jat tàm hơ̆ mờ mòn is đờng, bơsram is bơta chài uh, teh đờng goòng bơh yau kòn cau he dê”.

Tài bè hơ̆ mờ ồng A Bang rơhời git mòn Klông pút, t’rưng, hơ̆ sồng bal mờ tiang liang càl. Ờ mìng mòn mờ nhơl ală bơta đờng goòng bơh sơkàr, cau chài ồng A Bang gam bơto wơl cau pròc mhàm tờm tàm hìu bơnhă mờ làng bol tàm ƀòn in. Kòn ƀan ồng dê là bi Y Biêng geh ồng bơto wơl nhơl đờng klông pút, t’rưng mờ mut tàm mpồl nhơl đờng goòng kòn cau sàh Đăk Tô dê:

“Kơnờm pô bàp bơto wơl den tàng añ git nhơl đờng klông pút, đờng t’rưng bè tŭ do. Añ kờñ ngan sap ntas ală đờng goòng do dê, iat gơ lơh đềt mềr, mờng kwèng ngan. Sơlơ bơsram, sơlơ nhơl den añ sơlơ gŏ gùng đơs crih bơh yau kòn cau he dê kuơmàng ngan”.

Tàm thôn Đăk Tô 3, sàh Đăk Tô, ồng A Bang bal mờ mpồl cau chài pơlam tàp, rơndap lơh ală jơnau niam krơi is nàng tus bal ală dơ̆ pơrlòng tàm ƀòn lơgar. Geh ală jơnau bơh ồng mờ oh mi lơh is bè nhơl bơrlŭ bal Klông pút “Dơ̆ lơh yàng mut hìu pa”, nhơl bơrlŭ bal đờng t’rưng mờ sơng gơr “Lơh yàng mut kàl lơh sa pa”, “Lơh yàng chờ sa piang kòi pa”. Bi Y Yun ơm tàm thôn Đăk Tô 3 kờñ ngan sap đờng klông pút, geh cau chài ồng A Bang bơto wơl di rơndap tap sèng bơta chài, hơ̆ sồng mut tàm mpồl nhơl đờng goòng kòn cau sàh dê. Ờ mìng bè hơ̆ lơm, bi kơp kờñ geh bơto wơl oh kòn he in tai:

“Kơnờm cau chài ồng A Bang bơto wơl den hơ̆ sồng añ git bơta chài nhơl đờng klông pút. Añ sơnơng là bol hi kờñ pal pơn jat tai bơsram, mờ kung bơto wơl oh kòn in ală bơta lơi mờ bol he git nàng ờ gơtìp roh huĭ. Kơp kờñ ală oh, ală sau ờ mìng wă mờng mờ kờñ pal gơboh, kờñ niam chài kòn cau he dê”.

Uă nam do, cau chài ồng A Bang ờ mìng lơh broă tàm ƀòn lơgar, ồng gam tus ală sàh Văn Lem, Đăk Trăm mờ tiah Tu Mơ Rông nàng bơto wơl bơta chài mòn mờ nhơl ală bơta đờng goòng bè klông pút, t’rưng, pơgồp bơnah sền gàr mờ lơh niam bơta niam chài kòn cau dê. Nam 2022, cau chài ồng A Bang geh Anih duh broă Làng bol càr Kon Tum pà sră cơng tàng geh cồng nha dong kờl ală mpồl tus bal Pơrlòng cing mồng - tamya xoang ală jơi bơtiàn dùl êt nă cau càr dơ̆ 1. Nam 2023, ồng tus bal mờ Mpồl cau dờng sơnam càr Kon Tum bơyai lơh nhơl đờng goòng kòn cau mờ jơnau “Lơh yàng chờ sa piang kòi pa” geh khà B. Ồng A Ken, kwang bàng niam chài sàh Đăk Tô, càr Quảng Ngãi pà git:

“Cau chài ồng A Bang geh Dà lơgar pà khà jờng cau chài jak ngan. Wa neh mòn uă bơta đờng goòng bơh yau, ngan là Klông pút, t’rưng…. Pah tŭ tàm sàh geh dơ̆ lơh chờ, lơh yàng halà broă lơh niam chài, tơl nă cau sùm jà wa tus bal. Wa kung jơh nùs ngan, geh broă là tŭ lơi kung tă pơgồp bal bơta pràn”.

Neh lòt bơyai lơh uă tiah, geh cih dờp uă cồng nha bơh ală dơ̆ pơrlòng, dơ̆ bơyai lơh mờ geh Dà lơgar pà khà jờng cau chài jak ngan. Hơ̆ là bơta pơn yờ să, mơya gơ wèt mờ ồng A Bang, đờng goòng kòn cau, sap đờng, jơnau pơnđik, jơnau tamya là pròc mhàm, là bơta niam chài krơi is kòn cau dê kờñ pal geh sền gàr ai rơnàng tơnơ̆ do in:

“Broă mòn mờ nhơl đờng goòng bơh yau do neh đềt mềr mờ rài kis añ dê. Añ mòn, añ lơh tài gơboh ƀòn tờm, gơboh sap đờng mò pàng dê lời wơl. Ờ mìng tŭ lòt bơyai lơh, mờ tŭ tàm hìu, halà tŭ làng bol bơtòm tơrgùm mat, bol hi kung sùm ai đờng goòng nàng nhơl”.

Bơh ală ding gle, ding sơkàr tồn lah ờs bè ờs, mơya bơh mpàng tê cau chài ồng A Bang dê neh gơ gơs sap klông pút, sap t’rưng mpong ntas tàm ƀòn lơgar. Mờ bơta gơboh mờ bơta jơh nùs sền gàr niam chài jơi bơtiàn dê, cau chài ồng A Bang pơn jat tai bơto wơl rơnàng kơnòm să in ală sap ntas niam chài kòn cau Sơdàng dê nàng bơta niam do gơ kis sùm mờ ƀòn lơgar.