Tàm ƀlàng jơng gùng kềng gah hìu barah barài tàm ƀòn drà dềt Đăk Tô, kơnhoàl Đăk Tô, càr Kon Tum, cau chài A Huyên teh jơnau đơs crih tiơng pơn rơ mờ mờng kwèng ngan, hơ̆ là jơnau đơs crih “Tiếng chày trên sóc Bom Bo” mờ đờng T’rưng bơh bi dê tơn mòn lơh. Yô mpàng tê chài ngan, mờng ngan teh rơlĕ rơlùn jat gùng bơh jơnau đơs crih dê, cau chài A Huyền đơs bè bơta kờñ ngan đờng goòng jơi bơtiàn he dê, tàm hơ̆, đờng T’rưng geh sền bè tềl tơngŏ bè đơs crih tam ya bơh tiah brê bơnơm Tây Nguyên. Cau chài A Huyền, đơs: “Đờng T’rưng do den lơh jat bơta pa tŭ do dê, gơtùi nhơl ală jơnau đơs crih bơh yau, jơnau đơs crih ờs mờng mờ jơnau đơs crih rơnàng kơnòm dềt tơngai pa tŭ do dê. Nàng lơh geh đờng T’rưng do den kal ke ngan sơl, phan lơh bơh tờm đơr, nàng lơh geh đờng do pal mut tàm brê dờng, tơnơ̆ hơ̆ koh tơl gơl tờm đơr jat jơnau kờñ, pơr tềng bơnhă ồs nàng tờm đơr in ro mờ kơ̆ nàng kồis jat jơnau kờñ bơh he dê. Nàng ală ding đơr gơ gơs ală gùng đơs crih den he pal kồis ding di pal ngan mờ gơmut gùng ntas iăt mờ tồr, ding jòng là gùng gơmù ai ding lơyah là gùng gơguh”.

Ờ mìng mòn lơh đờng T’rưng lơm, cau chài A Huyền gam jòi tơrgùm mờ mòn lơh đờng lŭ- dùl bơta đờng goòng yŭt yau ngan rlau jơh tàm tiah Tây Nguyên dê. Ală nai lŭ bè ờs geh cèng rê bơh tàm dà croh, tơnơ̆ tŭ geh cau chài A Huyền mòn lơh gơ gơs đờng, mpoong jơnau ntas is ồn ngan, mờ barah bơrài mờ ndơ̆p ngan, bè ală jơnau đơs chiều bơh brê bơnơm dê. Cau chài A Huyền đơs, bơh tŭ gam dềt, nùs nhơm bi neh geh “ròng siam” mờ ală jơnau ntas lơbơn niam bơh ală đờng goòng jơi bơtiàn bè đờng T’rưng, đờng K’lông pút, đờng lŭ, cing mồng bơh kòn cau Sơdàng dê. Den tàng, tơnơ̆ tŭ jơh bơsram Đại họk Văn hóa nghệ thuật Ling klàng tàm Hà Nội, rê wơl tàm ƀòn lơgar Đăk Tô, càr Kon Tum, cau chài A Huyền neh geh gơ trăm tàm ù tiah dơ̆ lơh chờ, jơh nùs bơceh mòn ală bơta đờng goòng jơi bơtiàn. Bơdìh mờ broă bơceh mòn cau chài A Huyền gam lòt ràng tơlik tàm ală broă lơh dờng tàm ală tiah tàm tiah Tây Nguyên dê, ràng tơlik drơng broă tàm Ƀòn Niam chài- Lòt nhơl ală jơi bơtiàn Việt Nam (tàm Đồng Mô, Sơn Tây, Hà Nội). Cau chài A Huyền, đơs tai: “Añ tus bal uă ngan ală broă lơh dờng bè broă lơh dơ̆ lơh drà kơnuh sơnơm Ngọc Linh. Añ neh lòt ràng tơlik uă tiah bè:  Hà Nội, Sài Gòn mờ Đã Nẵng. Tus bal broă lơh añ kung geh ală kấp pà sră jờng rơ là “Cau gàr ồs, gàr ƀòn broă lơh ờs mờng bơh jơi bơtiàn dê” geh Gai lòng biàng mờ sră jờng rơ tŭ añ lòt ràng tơlik tàm Sài Gòn”.

 Ờ mìng bơceh mòn đờng gòng jơi bơtiàn he dê lơm mờ cau chài A Huyền sùm jơh nùs mờ broă lơh bơto bơtê wơl đờng goòng ai ală kơnòm bơsram mờ rơnàng kơnòm să in. Pa do, Cơldŭ lơh broă Niam chài mờ Yal tơngĭt jơnau kơnhoàl Đăk Tô, càr Kon Tum pơgồp bal mờ Anih duh broă Làng bol ƀòn drà dềt Đăk Tô pờ ơdŭ bơto yal wơl dròng cing jañ mồng, tam ya xoang mờ đờng goòng jơi bơtiàn ai ơruh pơnu in. Cau chài A Huyền neh bơto bơtê tơn ai 30 nă cau bơsram in. Cau chài A Huyền, đơs: “Nàng teh đờng T’rưng den pal bơsram tàp sùm ngai mang, ală kơnòm bơsram tus ndo bơsram, den tàp bơh 3 tus 4 nhai den gơtùi teh đờng T’rưng rao. Ală kơnòm bơsram kờñ ngan tus tàm do bơsram, tŭ iăt jơnau ntas đờng T’rưng dê ală oh kờñ ngan, nhơl uă den jơnau ntas gơ mut tàm mhàm, tàm să jan he dê. Tŭ do, cau bơsram tus bơsram mờ cau chài A Huyền là ală kơnòm bơsram bơsram bơh ơdŭ 4, ơdŭ 7, ơdŭ 9 mờ ơdŭ 10”.

Mờ bơta kờñ uă ngan lời ai gùng đơs crih bơh yau dê, den cau chài A Huyền gam uă bơta kơlôi sơnơng tềng đăp bơta pơhìn gơbàn roh tĕ bè dùl bơhiàn niam chài bơh jơi bơtiàn he dê. Rài kis pa tŭ do mờ măi mok, internet mờ ală broă lơh pa lơh rơnàng kơnòm să ơm ngài ală broă lơh cèng bal bơta mpồl bơtiàn bè dròng cing jañ mồng mờ ală bơta đờng goòng jơi bơtiàn dê. Den tàng, cau chài A Huyền neh lơh ngan ai gơ rê wơl mờ mpồl bơtiàn, dong rơnàng kơnòm să gĭt wă mờ kờñ gơboh bơta niam chài jơi bơtiàn dê. Cau chài A Huyền, đơs tai: “Tài bơh añ gŏ tŭ do rơnàng cau kra gĭt nhơl đờng goòng jơi bơtiàn he dê ờ gam uă tai, den añ kơlôi añ pal tàm pơdờn mờ bơto bơtê ai ală rơnàng kơnòm să in, bơto bơtê ai rơnàng kơnòm să in gĭt do là đờng goòng bơh yau bơh he dê, den he pal bơtàu tơnguh gơ rlau tai, nàng gơ̆p bơyô tàm lơgar mờ lơgar ndai in gĭt uă rlau tai bè bơhiàn ờs mờng bơh he dê, đờng goòng jơi bơtiàn he dê”.

Gơtùi đơs là, A Huyền là dùl nă cau chài pơn rơ jak tàm broă bơceh mòn mờ bơto bơtê đờng goòng jơi bơtiàn kòn cau Sơdàng ơm tàm kơnhoàl Đăk Tô, càr Kon Tum dê. Ală tă pơgồp bơh cau chài A Huyền dê ờ mìng lơh uă rlau tai bơta niam chài jơi bơtiàn kòn cau Sơdàng dê lơm mờ gam dong gùng đơs crih Tây Nguyên ngai sơlơ geh uă cau kờñ mờ sền dờng màng.