Mho ngai rlô, bi H’Theo mờ kòn ùr là H’Giang lòt tus bal ƀlàng coh plai nàng tàp coh plai. H’Theo, 35 sơnam là cau coh plai dờng sơnam ngan rlau jơh, ai H’Giang, 16 sơnam là cau kơnòm să ngan rlau jơh tàm mpồl coh plai cau ùr Đăk Đoa, Gia Lai dê.

Bi H’Theo đềt mềr mờ mpồl coh plai neh 7 nam, bơh tŭ kòn ùr là H’Giang pa bơsram ơdŭ 4. Ală dơ̆ lòt jăt mè tus ƀlàng coh plai, tus kềng gah ƀlàng coh plai tàp tê lơh hô tàm ală dơ̆ pơrlòng tàm sàh, tàm kơnhoàl hơ̆ sồng ală dơ̆ lòt pơrlòng ngài hìu neh lơh H’Giang gơboh plai ƀañ bơh tŭ lơi ờ gĭt sơl. Bơh anih sền jăt mè tàm pơrlòng, oh sơnđờm tàp mờ tŭ do bal mờ mè geh măt tàm mpồl coh plai rơcăng mŭt tàm tiah coh plai mờng chài. Mờ H’Theo, bơta chờ hờp hơ̆ gam dờng rlau tài bơh neh lời pơrdờn wơl ai kòn ùr in bơta pin dờn nàng rwah bơta he gơboh kờñ:

 “Rài yau, cau đơs cau ùr jơng lơbơn tê lơbơn. Mơya ngai do ring bal rao, ùr klau kung ndrờm gơ̆p lơm. Cau klau gĭt coh plai den cau ùr kung gĭt coh plai sơl. Kal ke den uă ngan, tài bơh he là cau mè, kung là cau lơh broă tờm tàm hìu bơnhă tai. Mơya tài gơboh kờñ, he rơ̆p lòt jăt, he dờng sơnam rao, den tàng ờ gam tai uă tŭ. He tề lam kòn nàng kòn in lơh jăt bơta kơ̆p kờñ coh plai mờng chài”.

Dilah H’Theo pal rơndăp broă hìu, broă sươn mìr nàng đềt mềr mờ plai bañ den Rơ Chăm H’Vưn là cau coh plai kòn cau Jrai tàm Pleiku Roh, sơnah ƀòn Diên Hồng gam pal jòi broă jà hìu bơnhă pà he in geh nhơl plai. Ală ngai sơnrờp, ùr ơruh deh nam 2009 sùm coh bal mờ ală cau bơyô klau tàm ƀòn tài bơh ờ huan geh bal bơyô ùr gơboh jơnau do.

Tŭ do, tŭ mpồl mŭt tus dùl gơl gùng pa, tus mờ coh plai mờng chài, kung là tŭ H’Vưn kung gam ơm tàm nam lồi dŭt kâp pe mờ geh bơta kờñ bal bơh hìu bơnhă dê.

 “Oh tŭ do bềng lơm tơngai: drim lòt bơsram, mho lòt coh plai, mang oh rơ̆p lòt bơsram tai nàng rơcăng pơrlòng jơh bơsram kâp pe. Oh rơ̆p rơndăp tăp sèng geh tŭ jiơ nàng lòt coh plai. Oh lòt jăt plai coh den bơh chờm bèp oh dê ờ bài ai sơl. Mơya neh là gơboh den ờ cau lơi rơgơi kơryan geh. Bơh chờm oh lòt tus ƀlàng coh plai ù gời lơm, ờ geh priă coh ƀlàng ñhơ̆t lơh is. Tơnơ̆ dơ̆ pơrlòng sơnrờp den bèp oh dê neh dùl nùs bal kờñ bal mờ oh”.

Jơnau bơh H’Theo mờ H’Vưn dê kung là dùl bơnah gùng lòt bal bơh mpồl coh plai ùr Đak Đoa, càr Gia Lai dê. Ală cau coh plai kòn cau Bahnar, Jrai tus bơh uă tiah, tàm ală sơnam mờ rài kis krơi is: cau gam lòt bơsram, cau lơh broă sa, geh cau neh geh kòn mờ là cau lơh broă tờm tàm hìu bơnhă. Khi tìp bal tàm bơta gơboh mờ plai coh mờ bơta tàp pràn să jan bơtau. Nàng gàr sùm ală dơ̆ tàp, khi pal rơndăp broă hìu, broă mìr; uă cau gam sồr bơklau, mè bèp dong kờl ƀà, pơndờm pơnđiang. Bơta kơ̆ nùs bơh tơl dơ̆ pơrlòng dê kung rơhời lơh ală cau pròc mhàm neh geh tŭ kơlôi rơcăng tŭ do neh dòn tàm gùng lòt mờ khi rwah.

Tàm Dơ̆ pơrlòng coh plai cau ùr ală jơi bơtiàn dồ êt nă cau Việt Nam dơ̆ sơnrờp nam 2026, mpồl Đak Đoa geh 10 nă cau coh plai Bahnar mờ 4 nă cau coh plai kòn cau Jrai. Ală ùr ơruh mŭt tàm dơ̆ tàm pơrlòng dŭt ndơl tìp mpồl Lục Yên càr Lào Cai dê mờ ai geh khà Bàr gùt mpồl. Mpồl coh plai neh cèng rê bơta pơniờ să ai să tờm he in mờ ai jơh bal cau gơboh tàm ƀòn tờm he dê in tơn. Ồng Nguyễn Hữu Tường, tàm jơnum làng bol tiah drà 5, sàh Đak Đoa, càr Gia Lai yal:

“Ală cau coh plai bơh mpồl Đak Đoa dê jơh nùs jơh tồr ngan. Bulah ală oh geh sre mìr uă mơya ală oh rơndăp tăp sèng broă sươn mìr nàng tus bal tàm mpồl coh plai. Añ gŏ ală oh jơh nùs bè hơ̆, añ chờ hờp ngan, kờñ ngan. Ală oh lơh geh khà jờng tàm kâp dà lơgar, añ brơn ngan ai ală oh in."

Cau tề lam mpồl coh plai tàm mờr 7 nam do là cau bơto coh plai Nguyễn Anh Dũng, geh ală cau tàm mpồl coh plai sơnđan là “bèp Dũng”. Bồ nam 2019, ồng tơrgùm ală cau ùr kờñ gơboh mờ coh plai, lơh gơs mpồl coh plai Link Coffe, Bơh ală dơ̆ pơrlòng coh plai tàm Tây Nguyên, tiah tàm gùl lơgar, mpồl geh khà bàr tàm dùl dơ̆ coh plai Futsal tàm ƀòn dờng Hồ Chí Minh nam 2022. Tus nam 2026, ală ùr ơruh tàm Đăk Đoa geh khà dùl tiah Tây Nguyên, hơ̆ sồng geh khà 2 dơ̆ coh plai cau ùr ală jơi bơtiàn kòn cau Việt Nam.

tơnơ̆ mờ uă nam pơgru bal mờ kơnòm coh plai jòi is priă nàng geh sùm mpồl coh plai, mpồl coh plai cau ùr Đăk Đoa mùl màl geh jào Mpồl coh plai Hoàng Anh Gia Lai in. Bơh tŭ do, ală cau tàm mpồl coh plai geh dong kờl tai ală bơta nàng bơsram tàp jăk rơlao, geh priă nhai mờ geh priă dong kờl, nàng tơlik jơh nùs nhơm kờñ gơboh mờ plai. Cau bơto coh plai Nguyễn Anh Dũng pin dờn là, do là tơngu me tờm nàng kờñ lơh geh jăt mờ jơnau kơ̆p kờñ coh plai bơh mpồl dê.

“Oh mi geh jơnau sồr gơwèt mờ Mpồl coh plai Hoàng Anh Gia Lai là drim gam lơh broă, drơng tàm broă lơh suơn sre mờ hìu nhă tàm hìu. Mho den mpồl tơrgùm tàm ƀlàng coh plai Đăk Đoa tơn. Do là tiah ƀuơn ai ală bơyô drơng broă hìu nhă mờ nùs nhơm kờñ gơboh coh plai in. Mpồl coh plai ring bal bè hơ̆. Ală bơyô gam gơboh kờñ ngan tài neh geh dờp, rơ̆p geh tàp, geh phan mờ geh ală jơnau bơsram pa di pal nàng gơtùi tus bal Dơ̆ pơrlòng coh plai Dà lơgar nam 2027 tus do”.

Tơnơ̆ dơ̆ tàp, ală ùr ơruh Đăk Đoa rê tàm hìu, rơcang ai dùl ngai lòt bơsram sră, lòt lơh broă, lòt mìr bè ờs. Mơya tàm dơ̆ tàp pơn jăt tai, ală ùr ơruh do lik tàm ƀlàng mờ dùl jơnau kờñ pa là geh khà tàm Mpồl coh plai cau ùr dà lơgar nam 2027 dê.