Ƀòn Ia Nueng tềng gah Tiah tềl kah yau niam bơnĕ Biển Hồ dê, tŭ do geh rơlao 200 hìu mờ rơlao 1 rơbô nă làng bol, tàm hơ̆ kòn cau Jrai geh rơlao 96%. Ƀòn do kung gam prăp uă bơta niam chài ờs mờng, hìu hờ đang, hìu rông, mpồl tờm jrê git nđờ rơhiang nam, dà mbòr ờs mờng bal mờ broă tàñ phan, trah rùp, tàñ ồi yau, cing mồng, phan sa.

Tàm tơngu me ală bơta kwơ niam chài, phan lòt nhơl mpồl bơtiàn ƀòn Ia Nueng geh lơh gơs gơl lòt nhơl sền bơh Biển Hồ, mpồng ƀòn, hìu pơrjum mpồl bơtiàn, dà mbòr ờs mờng, tiah lơh broă tus mờ ală hìu homestay. Jăt mờ broă lơh do, cau năc gơtùi sền nàng git bè wă bè bơta niam chài cing mồng, tus bal tamya xoang, sền broă tàñ ồi yau, tàñ sơ̆, nir; tus bal ală broă lơh sa suơn sre bè tam kòi, tơwès kòi, piah kòi, buh piang ding. Tàm kàl kơphe, cau năc gơtùi lòt pic plai kơphe, coh kơphe, bŏ kơphe mờ klài is dà kơphe nàng hùc; mờ sa ală phan sa ƀòn lơgar, tìp bal mờ làng bol mờ jòi sền nàng git bè broă lơh hìu ơm tàm mpồl bơtiàn.

Gơwèt mờ làng bol tàm ƀòn, bơtàu tơnguh lòt nhơl mpồl bơtiàn ờ mìng pờ geh gùng nàng tơnguh geh uă priă mờ gam geh bơta pràn prăp gàr, bơto wơl broă lơh ờs mờng mờ niam chài jơi bơtiàn dê nàng ală rơnàng kơnòm să in. Lŏ Rơ Lan Han, kis tàm ƀòn ia Nueng pà git: “Kơ̆p kờñ làng bol rơ̆p geh dùl nùs bal, tam klăc bal nàng pơgồp bal tàm broă bơtàu tơnguh lòt nhơl mpồl bơtiàn uă rơlao, tam pà bal broă lơh mờng chài broă tàñ ồi yau nàng rơnàng kơnòm să in nàng ală bơyô git uă rơlao bè bơta niam chài. Pal geh broă bơto ală bơyô kơnòm să in nàng gơs cau pơlam cau lòt nhơl nàng ală cau git mờ yal is bè bơta niam chài kòn cau Jrai dê”.

Ồng Đặng Khánh Toàn, Phó Chủ tịch Anih duh broă Làng bol sàh Biển Hồ pà git, sàh do ai làng bol là cau tờm lơh tàm broă bơ̆t bơtàu mờ bơtàu tơnguh phan lòt nhơl mpồl bơtiàn. Tàm tơngai tus, sàh Biển Hồ pơn jăt tai lơh gơs bơta niam broă lơh drơng ala, bơtàu tơnguh anih ơm, phan sa, phan geh lơh mờ tê ờs mờng, tơrbŏ bal mờ mpồl lơh sa kă bro lòt nhơl mờ lơh pràn broă yal. Mờ pơgồp bal ƀòn Ia Nueng mờ ală anih lòt nhơl bè Biển Hồ, mpồl tờm nho git nđờ rơhiang nam, dòr ce mờ bơnơm ồs Chư Đang Ya, lơh gơs ală gơl lòt nhơl pơgồp bal, pơgồp bal tàm broă lơh geh uă phan mờ tơnguh bơta niam ai broă lòt nhơl càr Gia Lai in. “Ƀòn lòt nhơl mpồl bơtiàn Ia Nueng bol añ ai là cau lơh tờm là làng bol bơh ƀòn lòt nhơl mpồl bơtiàn dê, làng bol là cau neh lơh gơs bơta niam chài, den tàng phan geh lơh bơh suơn sre kloh, dơ̆ lòt nhơl, gơl lòt nhơl, phan uh, phan teh nàng bal mờ Dà lơgar nàng ai phan lòt nhơl mpồl bơtiàn tus mờ cau năc. Bơh tŭ hơ̆ dong kờl tơnguh priă geh, kơl jăp bơta lơngăp lơngai chính trị, mpồl bơtiàn tàm ƀòn, pơgồp bal tàm broă ai Biển Hồ ngai sơlơ bơtàu tơnguh”.

Tơnơ̆ mờ dơ̆ yal, cau ala măt, làng bol mờ mpồl lơh sa kă bro lòt nhơl tus bal broă lơh lòt sền, nhơl sền ală bơta niam chài bal mờ ală broă lơh pơnrơ ngan tàm phan lòt nhơl mpồl bơtiàn tàm ƀòn Ia Nueng dê.