Bơta niam Hìu rông ƀòn Ia Gri, sàh Biển Hồ gal ngan làng bol mờ cau năc tus. Săp dròng cing nggồr ngàc, geh bal mờ săp bơh ală phan teh, phan uh jơi bơtiàn dê. Cau chài Rơ Châm Chốt, tus bơh ƀòn Mrông Yố, sàh Ia Phí, càr Gia Lai chờ hờp đơs: “Añ tus tàm do geh cèng bal đờng ting ning, do là dùl bơta đờng jơi bơtiàn dê, nàng pơgồp bal mờ bơta chờ hờp, teh nàng làng bol mờ cau năc in iăt. Bơta lơh añ chờ hờp ngan rơlao tai là geh sền gŏ hìu rông neh lơh gơs bal mờ bơta niam bơh bơkào chi bơtăng dê sơlơ niam bơnĕ ngan”.

Gơwèt mờ lŏ Mơ Ly, tus bơh sàh Đức Cơ, càr Gia Lai, do là dơ̆ nàng lŏ geh pơgồp bal săp đơs crih, nàng bal mờ ală cau tus bal tàm broă lơh đơs crih tamya mờ tam pà bal nùs nhơm chờ hờp tàm ngai lơh chờ. “Añ chờ hờp ngan tài geh tus bal đơs dùl jơnau đơs crih bè Tây Nguyên, bè Đảng dê. Añ kung chờ hờp sơl tài geh sàh Biển Hồ ai tơl bơta niam nàng tus bal lơh Festival cing mồng nam do. Bơkào chi bơtăng niam bơnĕ ngan, añ kờñ ală cau tus tàm do nàng nhơl sền dơ̆ lơh chờ”.

Geh cau tus mờ Chư Đang Ya tài gơboh kờñ bơta niam bơnĕ bơh bơkào chi bơtăng dê, geh cau kờñ jòi sền nàng git ală broă lơh niam chài, kung geh cau den mìng kờñ sền gŏ ală bơta lài do mìng geh gŏ bơh tàm pang rùp. Lŏ Y Nư, bơh Kon Tum neh gờñ tus tàm Chư Đang Ya lài mờ tŭ geh bơyai sơn đờm lơh chờ. Lŏ pà git, ală jơnau yal bè lơh chờ tàm ală pang yal tơngit internet mpồl bơtiàn mờ anih lơh broă yal tơngit neh lơh nùs nhơm lŏ kờñ tus nàng sền, den tàng lŏ neh tus nàng sền lơh chờ do. 

Lŏ Y Nư pà git tai: “Do là dơ̆ sơnrờp añ tus mờ Chư Đang Ya. Añ gŏ cau yal tàm internet mpồl bơtiàn lơh chờ tam do chờ hờp ngan, den tàng añ kung kờñ tus nàng sền. Añ kờñ sền ală broă lơh chờ, iăt đơs crih, sền tamya, sền cau tàñ ồi yau mờ lòt nhơl sền ală hìu ràng tăc phan tàm do”.

Gam gơwèt mờ lŏ Lan, lơh chờ bơkào chi bơtăng mờ cing mồng Chư Đang Ya là dùl broă kờñ geh jòi sền krơi is ngan, bŭ lah neh geh tŭ ơm kis tàm càr Gia Lai. “Añ kis tàm càr Gia Lai tàm 5 nam bloh, mơya do là dơ̆ sơnrờp añ geh tus bal lơh chờ bơkào chi bơtăng, lơh chờ cing mồng Chư Đang Ya. Añ chờ hờp ngan. Tàm hơ̆, bơkào chi bơtăng lì uă ngan, lơh geh ù tiah niam bơnĕ ngan. Di lah cau lơi ờ hềt tus mờ lơh chờ bơkào chi bơtăng den tus tĕ nàng sền dùl dơ̆ yơ”.

Ờ mìng hòi jà ală cau tus nhơl sền, Festival cing mồng mờ Poh bơkào chi bơtăng - Bơnơm ồs Chư Đang Ya gam dờp geh broă sền gròi bơh ală cau lơh broă lòt nhơl. Gŏ măt tàm Chư Đang Ya tàm kàl lơh chờ nam 2026 do, mò Phan Thị Thu Minh, Kwang Lam bồ dùl công ty lòt nhơl tàm Hà Nội pà git: “Di dơ̆ lơh chờ bơkào chi bơtăng nam 2026, añ tus tàm do nàng nhơl sền. Añ kung kơ̆p kờñ là, tàm nam do, mờ broă tơmŭt bal ală càr, lơh chờ bơkào chi bơtăng rơ̆p lời wơl uă bơta niam ai cau năc in tŭ tus mờ lòt nhơl tàm càr Gia Lai dê”.

Tàm rài măi mok sồ, tơl nă cau năc gam gơtùi gơs dùl nă cau yal bè tiah geh tus. Dùl nơm rùp niam, dùl gơl video geh kŭp wơl tơnơ̆ mờ dơ̆ lòt nhơl ndrờm gơtùi dong kờl rùp rài càr Gia Lai tus mờ uă cau rơlao. Bơyô Đức, dùl nă cau tiktoker tus bơh Đức Cơ pà git: “Ngai do añ tus tàm do mờ là cau bơceh lơh tơngu me sồ, nàng tus nhơl sền mờ tus bal mờ nùs nhơm chờ bơh lơh chờ dê. Añ gŏ ală cau tus bal niam ngan, tus bal kŭp rùp, lơh video tàm ală tiah niam, hơ̆ sồng tơmŭt tàm internet mpồl bơtiàn nàng ală bơyô tàm lơgar mờ ală lơgar gơtùi sền bơta niam càr Gai Lai dê. Añ kơ̆p kờñ ngui măi kŭp rùp añ dê nàng ală cau in gŏ càr Gia Lai niam bơnĕ bè lơi”.

Bơh Festival cing mồng tus mờ poh bơkào chi bơtăng - Bơnơm ồs Chư Đang Ya, càr Gai Lai gam geh tai dơ̆ niam nàng yal ală jơnau bơh càr dê mờ ală bơta kwơ krơi is ngan. Mờ tơl nă cau tus tàm do, tơl pang rùp geh kŭp wơl, tơl jơnau geh tam pà bal ndrờm gơtùi gơs dùl anih tơrbŏ ai bơta niam bơnĕ bơh ù tiah do dê tus rềp rơlao mờ cau năc lòt nhơl in.