Tàm ù tiah pơrjum mpồl bơtiàn, tềng đăp ƀlàng jơng hìu rông ƀòn Ia Mrơn, sàh Ia Pa, càr Gia Lai, tờm gơ nơng jơnhoa ngan geh bơka niam ngan, àng gơ crà ală rùp rài. Gùt dar tờm gơnơng là ală phan ơn pơdơng duh khoai neh geh làng bol rcang lài niam ngan: geh 4 drăp tơrnờm, dùl nơm sur jù mờ 2 nơm sơ̆ ơn kòi. Cau bơjơu Rô Bhak, mờ phan soh kòn cau ờs mờng, ala mat làng bol lơh jat bơhiàn duh khoai Ñô lir bông.

“Ơ.. ală Yàng tàm đăng trồ, tềng hơ đơm ù, Yàng Bơnơm, Yàng Dà, Yàng Kòi bơh kòn cau Jrai dê! Ngai do, ƀòn lơgar bol añ neh tơnhào geh ală gar kòi bồ kàl. Kơnờm geh mìu càl niam, kơnờm Yàng sền gàr dong kờl, tờm kòi neh hòn gơs niam, gơlik gar, cèng rê gar phe ròng kis ƀòn lơgar. Tŭ do, ƀòn lơgar rcang piang pa, tơrnờm mờ phan ơn pơdơng, jơh nùs ki ngàm pơdơng tus ală Yàng, dan ưn ngài tài bơh neh sền gàr dong jơm glòm ai srê mìr in”.

Tơnơ̆ dùl kàl lơh broă bòl glar, bơhiàn lơh Yàng “Ñô lir bông” là dơ̆ nàng kòn cau Jrai in tơngŏ nùs nhơm gĭt ưn ngài trồ tiah, ù tiah, Yàng mờ mò pàng neh sền gàr dong kờl ai kàl tam phan in hòn gơs niam. Mò Nay H’Luir, ơm tàm ƀòn Chơma, sàh Ia Pa tus bal ngai chờ pà gĭt, do là tŭ nàng làng bol in sền wơl bal cồng nha lơh broă, pơyoa bơta kơ̆p kờñ bè ală kàl tam phan pơn jat tai.

“Sàh Ia Pa bơyai lơh ngai chờ ờs mờng mờ lơh tơngŏ wơl dơ̆ lơh chờ “Ñô lir bông” bơh kòn cau Jrai dê añ gŏ niam ngan. Dròng cing, tam ya xoang ờ gơtùi ờ geh tàm bơhiàn niam chài ờs mờng bơh kòn cau Jrai dê ờ. Is ồn oh mi soh phan bơhiàn yau, phan kòn cau bơh cau Jrai dê tàñ is, pơn yờ să ngan. Dơ̆ lơh chờ Ñô lir bông, sa piang pa gam gơtìp rơ hời hŭi tĕ, mơya geh Dà lơgar sền gròi lơh tơngŏ wơl bè do, chờ hờp ngan. Do là bơhiàn niam bơnĕ bơh jŏ rài; tŭ tơnhào jơh phan tam, sa piang pa pal duh khoai Yàng, gĭt ưn ngài Yàng neh dong kờl, kơ̆p kờñ tơl bơta niam bơnĕ rlau tai”.

Broă lơh tơngŏ wơl dơ̆ lơh chờ “Ñô lir bông” tàm sàh Ia Pa, càr Gia Lai gơ hòi gơ jà bơta tus bal bơh mpồl bơtiàn, is ồn là ală kra ƀòn, cau chài mờ cau gĭt wă bơhiàn yau. Ồng Ksor Ther, lài do là Lam bồ Cơldŭ lơh broă Bơto bơtê mờ Bơsram Ia Pa, càr Gia Lai pà gĭt, lài mờ tŭ lơh tơngŏ wơl dơ̆ lơh chờ “Ñô lir bông” kòn cau Jrai, gah lơh broă geh gơnoar neh tă pơgồp jơnau mờ ală cau kra ƀòn mờ cau gĭt wă broă lơh tàm tiah do dê.

“Do là nam sơn rờp sàh bơyai lơh gŏ chờ hờp ngan. Lài mờ tŭ bơyai lơh, đơng lam bồ tiah do geh tă pơgồp jơnau đơs bơh làng bol dê, sàh geh blơi cing pà ai ală ƀòn in, rcang phan soh kòn cau ai ală sau kơnòm pa tàu in soh mờ tàp dròng cing, tam ya xoang. Dà lơgar geh dong kờl mờ rcang lài niam ngan. Dơ̆ lơh chờ Ñô lir bông, bơhiàn tàm bau ờs mờng mờ dơ̆ lơh Yàng duh khoai dà mbòr ndrờm geh lơh tơngŏ wơl tàm dơ̆ do, bol añ gŏ chờ hờp ngan nàng ai tơl nă cau in gĭt tus niam chài ờs mờng niam ngan do”.

Broă lơh tơngŏ wơl dơ̆ lơh chờ “Ñô lir bông” tàm Ia Pa, càr Gia Lai pơgồp bal mờ jơnau kờñ prap gàr, ngui niam bơta kwơ phan lời wơl niam chài tàm Broă lơh jơnau kờñ dà lơgar bè bơtàu tơnguh niam chài nam 2026. Ồng Nguyễn Thái Sơn – Kwang lam bồ Anih tờm Niam chài, Yal tơngĭt jơnau mờ Tàp pràn să jan sàh Ia Pa, pà gĭt, tàm tơngai tus, sàh pơn jat tai lơh tơngŏ wơl ală dơ̆ lơh chờ ờs mờng bơh yau nàng kờñ prap gàr mờ ngui niam bơhiàn niam chài is ală jơi bơtiàn dê.

“Do là dơ̆ lơh chờ “Ñô lir bông” geh bơyai lơh tàm ƀòn Ia Mrơn, là bơhiàn niam chài niam ngan, pơn rơ ngan bơh kòn cau Jrai dê. Broă lơh kờñ geh lơh sùm nàng prap gàr mờ ngui niam ală bơta kwơ niam chài. Broă lơh pơn jat tai ràng tơlik dròng cing jañ mồng, ală dơ̆ lơh chờ geh pơhìn gơbàn roh tĕ, den Anih tờm niam chài rơ̆p lơh tơngŏ wơl nàng rơnàng kơnòm să in tàm pơr dờn, tă pơgồp jơnau đơs, sền gĭt”.

Tơnơ̆ bơnah lơh chờ, nùs nhơm ngai chờ tàm ƀòn Ia Mrơn, sàh Ia Pa gơ gơs hô hơng tàm săp ntas cing mồng mờ ală dar tam ya xoang. Ală mpồl dròng cing bơh ală ƀòn tàm sàh tìp mat bal, lơh kwèng bal; làng bol mờ năc lòt nhơl tus bal dŭi che, sơnđoh bào tạ, jơm mat kŭp ada. Ală anih ràng tăc phan yal tơngĭt broă lơh sa suơn sre, phan brê mờ phan sa tàm tiah do dê pơgồp bal rùp rài ai ngai chờ in.